No te haawhe-paahi i te rua karaka ka noho te Pika ki runga ki tona nohoanga.

Ka mutu te karakia.

Ka panuitia tuatahitia, tuaruatia tua torutia etahi Pire. Ka mutu.

Rangiwaea Poraka.

Ko Te Hutana (Mr. Houston).— Ka haria atu e ahau te ripoata a te Komiti mo nga Mea Maori mo runga i te pitihana a Meiha Keepa Te Rangihiwinui. I tono te kai-pitihana me mahi tetahi ture kia taea ai te whakawatuarua i Rangiwaea Poraka, a kua ripoata te Komiti kaore kau a ratou kupu whakahau mo taua mea. Ka motini ahau kia whakatakotoria te ripoata ki runga ki te teepu o te Whare.

Ko Te Ao.—Ka motini ahau me whakahoki te ripoata ki te Komiti kia ata whiriwhiria ano. te take kaore te katoa o te Komiti i tae ki to ratou ruma i te taima i whiriwhiria ai i whakataua ai taua ripoata.

Ko Te Hutana (Mr. Houston).— Ka whakahe ahau mo te whakahoki o te ripoata ki te Komiti. Kua roa taua pitihana e takoto ana i te aroaro o te Komiti. E kore e taea te hui katoa i nga mema o te Komiti i nga ra katoa, notemea he mema hoki ratou no etahi atu Komiti. Mehemea ka whakahokia te ripoata ki te Komiti, a ki reira tatari ai kia hui katoa nga mema o te Komiti, tena he neke tonu te mahi i ia ra i ia ra a hiki noa te Paremete. Kua tino whiriwhiria tenei pitihana e nga mema Maori e nga mema Pakeha hoki, a koi na ta ratou whakatatutanga e mau na i roto i te ripoata a te Komiti; a, e tino mohio ana ahau, ahakoa whakahokia te ripoata ki te Komiti, koi nei ano ta ratou whakaotinga, e kore e rereke. Ki toku whakaaro he maumau taima noaiho te whakahoki i te ripoata ki te Komiti. I tino tupato te whiriwhiri, a i pau katoa te whakaaro o tenei mea e te Komiti.

Tonoa ana e Te Ao kia pooti te Whare mo tenei mea. No te pootitanga ka kitea e toru tekau ma rua nga mema ia Te Hutana, a e rua tekau ma ono ia Te Ao. Heoi hinga ana te motini a Te Ao, a kore ana te ripoata e whakahokia ki te Komiti.

Te Motu O Hauturu.

Ko Te Miterehana (Hon. Mr. Mitchelson).— Ka patai ahau ki te Kawanatanga, kua peheatia nga kupu page 25whakahau a te Komiti mo nga Mea Maori o te tau kua pahemo ake nei, ara, mo te whakaoti i te hoko o te Motu o Hauturu?

Ko Te Makenehi (Hon. J. MeKenzie).—Ka whakaatu ahau ki te mema honore, ka tekau nga ingoa kua haina, e rite ana era ki te toru koata o te Moutere. E rima nga ingoa e toe ana kaore ano i haina. Kaore nga mea e toe nei e whakaae ki ta te Kawanatanga moni e whakaari ana mo aua hea, engari kaore hoki aua Maori e whakaatu mai i tetahi moni, e ahua tika aua, e whakaae ai ratou ki te hoko. Kei muri o te Paremete ka mahia tetahi tikanga e kopi ai taua hoko.