Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1891-1895

Wenerei, te 6 o Hepetema, 1893. — Nga Minita O Te Kawanatanga

Wenerei, te 6 o Hepetema, 1893.
Nga Minita O Te Kawanatanga.

Te Hetana.—I runga i taku whakaaetanga i tera rangi ka whakaatu ahau ki te Whare inaianei i te ahua o nga Minita o te Kawanatanga. Kua puta te tono kia hoki mai a Te Karimana hei Minita mo nga Ture me nga mahi Maina. Kihai ia i pai te mahi Minita Maori a kua tangohia e ahau taua mahi. A me ki atu ahau he nui toku hiahia kia whakahaerea he ritenga e mutu ai nga raruraru kino e tau ana ki runga ki nga Maori me a ratou whenua. Kia oti pai tenei katahi ka kake haere te ora o tenei motu, a na te kaha o toku hiahia pera i tangohia e ahau te mahi Minita Maori.

H. Taipua.—E kore ahau e tu ki te korero mehemea kihai i te Pirimia i page 44ahua whakapae ki au mo aku korero mo Te Karimana. Te take i pera ai aku korero mona, he rereke o tana mahi iaia e Minita Maori ana. I whakahoa raua ko Te Mete ki te tango i tetahi Whenua nui a nga Maori, he mea hoko mo te 12 hereni mo te eka a kei te hokona atu taua whenua e raua inaianei mo te £15 mo te eka, nuku atu te utu mo etahi eka. Tera raua e wini ki te £40,000 i runga i tenei poraka a Te Umutaoroa. Na te whakawakanga o taua keehi, i riro nga roia mohio katoa ki te taha kia Te Karimana. Mehemea i tika tana mahi iaia e Minita ana, e kore e tu tenei whakawa mona. Tetahi mahi he a taua Minita he here i o matou whenua, tae atu ki te wha miriona eka i panuitia e ia, a a no te aroha mai o te mema mo Mataura, ara a Te Ritihana, i hoki ai aua eka kia iti iho. Kaore e pai kia hoki atu ano a Te Karimana hei Minita. Engari a Timi Kara inahoki kanui tona kaha ki te kawe mai i nga Pire ki tenei Whare hei tango rawa i nga mana a nga Maori ki te whakahaere i o ratou whenua. Kanui te kaha o Timi Kara ki te homai i enei tu Pire na reira e tika ana kia tu koia hei Minita Maori. Na inaianei kua tangohia e te Pirimia ki aia te mahi Minita Maori, erangi katahi ahau ka kite ko te Pirimia o te Koroni hei Minita Maori, E he ana tenei, inahoki ki te ara he tautohetohe mo runga mo tetahi mea i waenga ia matou me te Minita Maori, kua watea matou ki te haere ki te Pirimia mana e whakatau taua raruraru. Na inaianei i te mea kua tu tonu ko te Pirimia hei Minita Maori, kua kore he tangata watea hei whakatau i nga tautohetohe. Otiia e kore te Pirimia e kaha ki te waha i enei pikaunga taimaha rawa. Ka rite tonu ia ki te Kai Tiaki a ka waha ia Niu Tireni tonu i runga i tona tuara. Tetahi mea e whakahe ana ahau ko te hoatutanga mahi e te Kawanatanga ki tenei tangata kia Wiremu. E kore e pai kia whakamahia taua tangata.