Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1891-1895

Paraire, te 1 o Hepetema, 1893

Paraire, te 1 o Hepetema, 1893.

Kooti Whenua Maori I Otorohanga.

Ko Hiara.—Patai ana ki te Minita Maori, ko awhea whakapuare ai te Kooti Maori ki Otorohanga? He mea nui tenei mo te koroni a me manaaki te Minita i taua patai.

Te Riiwi.—E kore a rawa e taea te ki ko awhea tu ai ano te Kooti ki page 42taua whenua, kei te raruraru nga Tiati katoa ki etahi atu wahi a e kore e mutu a ratou mahi i roto i nga marama maha atu.

Nga Ture Maori.

Tame Parata.—E patai ana ahau ki te Kawanatanga mei kore ratou e whakaae kia perehitia tuaruatia nga Ture katoa e pa ana ki nga Maori mai ano i te whaka—koronitanga o Niu Tireni? He pai rawa mehemea ka whakaaetia tenei mea a katahi nga Maori ka ahei te rapu i nga tini ture e pa ana kia ratou, me te mohio hoki ki nga ritenga. Mehemea ka pai te Kawanatanga ki tenei tera he nui te utu e puta mai i te mahi hokohoko o enei pukapuka, a kaore e ngaro te moni o koroni.

Te Riiwi.—E kore au e kaha ki te whakaae ki te hiahia o te honore mema; he nui rawa no te utu mo te perehitanga. Erangi ko te nuinga o enei ture kua oti te perehi kua oti hoki te whakamaori.

Nga Rahui O Te Tai Hauauru.

Ko Hakenehi.—E patai ana ki te Pirimia mehemea kei te mohio te Kawanatanga i utua ki te Kai Tiaki i tera Tihema tetahi moni i runga i te reti i raro o "Te Ture Rahui o Te Tai Hauauru, 1892," a kaore ano kia utua tenei moni ki nga Maori whai paanga, a heaha te take i roa ai, a me mea te Kawanatanga i tetahi ritenga whakahaere kia tere te utu i enei moni a muri ake nei.

Te Waari.—E pa ana tenei patai ki tetahi moni £1,135 i hoatu ki te Kai Tiaki i te Tihema. I puritia taua moni kia whai takiwa te Kai Tiaki ki te titiro mehemea e rite ana aua moni reti, a meake nei tuhaina ai taua moni ki nga Maori.

Ture Whakamana Take Whenua Maori.

Te Hatana.—E motini ana ahau i te panui tuarna o tenei Pire a ka parea ki te Komiti Maori. Ki te whakahokia mai i reira katahi tatou ka korero roa mo ona tikanga katoa.

E. M. Kapa.—E patai ana ahau ki Pirimia mehemea tera e whai mana nga Maori i raro o tenei Pire ki te tono kia kimihia kia whakaaetia a ratou mate? I whakaurua he rarangi pera ki roto ki te Pire o tera tau, ara te rarangi 19 a kua patua tera i roto o tenei.

Te Hetana.—Ki te tae tenei Pire ki te Komiti Maori ma te honore mema e whakauru i taua rarangi mehemea e hiahia ana ia. Panuitia ana taua Pire, parea ana ki te Komiti Maori.