Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1891-1895

Taite, te 24 o Aluhata, 1893. — Pire Pooti

Taite, te 24 o Aluhata, 1893.
Pire Pooti.

Meiha Ropata Wahawaha.— He kupu ruarua nei aku mo runga mo nga tikanga a nga iwi Maori o tenei motu o Aotearoa o mua mo runga mo nga putake e wakahaerea ana e ratou e kore ai nga wahine e uru ki roto o te whakaminenga. I roto i te marama i ia tau i te mea e huihui ana te whakaminenga o nga Maori ki te whakahaere i a ratou tikanga me a ratou karakia. E hui ana ratou i ia tau i ia tau, i roto i nga tau katoa, penei ano me tatou e hui mai nei i ia tau ki te Paremete nei. Maku e whakaatu atu etahi o nga mahi kaore nei e uru te wahine ki roto. Ko nga mahinga waka whakairo, me nga karakia mo nga whawhai kia toa ai ki te hoariri. Ko nga mahinga whare whakairo, me nga whata whakairo hei matakitaki ma nga iwi. Ko nga mahinga wharepuni, huihuinga o te iwi, ko reira ano hoki te iringa o nga patu mo te hoariri. Ko nga karakia whenua, kia hua ai te kai. Ko enei mahi katoa he mea tapu, kaore nga wahine e uru atu; kaore ano hoki nga wahine e whakararuraru i enei mahi katoa, he aitua hoki ka pa ki a ratou mehemea ka pera. page 6Me whakahua atu e au nga mahi tika i whakaritea ma nga wahine. He whatu pueru, pake, hei kahu mo raua ko tana tane me a raua tamariki; he raranga kete hei kohi mo a raua kai, tae-wa, kumara, aruhe, puha. He whatiwhati wahie hei tahu kai, ka waha atu i nga kai me nga wahie ki te kainga. E hara enei mahi i te mea tapu. Koia ra a matou nei tikanga a te Maori, a no to koutou taenga mai me te putanga mai o te rongopai, ka kite matou e pena ana ano te tikanga. Kaore ano hoki nga wahine kia whakaturia hei kaikauwhau. Kaore ano hoki he minita wahine, kaore hoki nga wahine e uru ki o kouton runanga. Katahi ano no enei tau ka rongona te reo o nga wahine porangi e kauwhau haere ana i nga rori o Poneke me Kihipane me era atu wahi. Katahi matou ka mahara ko tewhea o enei te mea tika. Kaore au i te tino mohio kei te uru ranei nga wahine ki roto ki nga tikanga o tenei Pire. Kaore ano au kia mohio noa kei te hiahia nga wahine Maori ki te mana pooti kia riro i a ratou. Kaore ano au kia rongo i te tuku pitihana mai nga wahine Maori ki te Paremete, kaore ano hoki he pukapuka a nga wahine Maori kia tae mai ki nga mema o te Paremete tono mai kia whakaaetia te pooti wahine. Kaore ano au kia kite pitihana a nga wahine Maori kia tukua mai ki te teepu o tenei Whare penei me te pitihana e tu mai nei. He mate ano kei roto kei nga ture e paahitia nei, a tera pea he waero ano kei te hiku o tenei Pire a tera pea ka pa he mate ki a ratou i te mea kaore i marama to ratou whakaaetanga kia uru ki roto ki tenei Pire. E kore au e korero roa atu mo runga mo enei putake. Ko taku mahara me waiho atu mo tera atu tau kia mohiotia mehemea e hiahia ana nga wahine kia tukua atu taua mana ki a ratou, e pai ana. E korero ana au mo te taha ki nga wahine Maori mehemea e pa ana ki tenei Pire. Heoi me nuku atu.