Pire Kooti Whenua Maori.

Timi Kara.—I runga e te motini kia korerotia tuaruatia tenei Pire e mea ana ahau he Pire tenei hei whakamana i te Kawanatanga kia whakaturia tetahi kairiwhi mo te Tiati Tumuaki kua tono hoki te Tiati Tumuaki kia whakamutu a e ia taua mahi mo tetahi wa a kua whakaaetia taua tono ana. Kua ahua pohe ana kanohi a e hiahia ana ia kia haere ia ki tetahi Takuta tino mohio. Ko te tikanga hoki o taua rarangi he whakaae kia mutu tana mahi mo tetahi wa. Tera atu ano hoki etahi rarangi e hiahia ana ahau kia whakaurua ki roto i tenei Pire i te tukunga kia komititia e te Komiti mo nga Mea Maori, no reira e hiahia ana ahau kia tukuna tonutia atu ki taua Komiti inaianei.

Te Roretana.—Ki taku whakaaro he mea tika kia mohio te Whare ki nga tikanga o ena rarangi no te mea i raro i enei tu whakahaere e ahua rite ana ki te tono kia korerotia tuaruatia enei rarangi i te mea kahore ano i kitea ona tikanga ki taku mohio he rarangi enei hei whakahaere i nga take Maori kua whakahuatia i roto i te Whare i roto i nga rangi e rua kua pahure nei Otira e runga i te mea e tukua mai ana ki te Whare ekore e whakaarohia enei take e hiahiatia ana hei whakahaere i nga tikanga o tenei Pire.

Timi Kara.—Ki taku whakaaro he mea tika ano kia whakaurua enei rarangi a mehemea tera etahi whakahe ka whakapumautia e ia nga tikanga o te Pire ki nga tikanga e mau nei i roto ara tetahi rarangi mo Mangaohane me Horowhenua, nga rarangi mo nga whenua tiaki i Whakatane me etahi whenua kei te Waipounamu. Otiia mehemea e whakahengia ana aua rarangi hou, kaati me waiho te Pire kia whai tikanga mo te Tiati Tumuaki anake.

Te Hetana.—Motini ana kia hikitia tenei take korero, a nukuhia ana.