Mane, te 26 o Hepetema, 1892.
Pire Maina.

Taipua.—I te tukunga tuatahi mai o tenei Pire i whakamaoritia nga korero o roto a kua ata whiriwhiria e matou nga tikanga, a kihai i kitea e matou tetahi mea he i roto. Erangi ki taku whakaaro na te Komiti mahi i nga mahi koura i whakarereke. Akuanei i runga i te rarangi tuarua kua whakarereketia te nuinga e te ture o tera tau e taua rarangi o tenei Pire. I mea te rarangi 71 o te wahi tekiona (1) i roto i te ture o tera tau me ata whakarite e te Kawanatanga me nga Maori te utu o nga whenua i waenga i a ratou. Na e tino marama ana taua rarangi, i mea hoki me riihi nga whenua Maori i muri iho i te ata korero i nga tikanga ki nga Maori. Na i runga i taku korero i nga tikanga o te wahi rarangi tuarua o te rarangi tuarua ka ahei te tango i nga whenua Maori a me utu mo aua whenua kia kotahi hereni i te tau a kaua e nui atu i tena. Ki taku whakaaro e tino he rawa ana tena. Ko taua rarangi e ahua rite ana ki te rarangi 71 o te tau kua hori nei a e mea ana kia utua e nga Pakeha kia rite ki te tekau hereni i te eka. Na ko nga whakahe kua whakaekea ki runga i nga Maori whai take. I ahua rite ki taku whakaaro ki te raupatu i nga whenua Maori. I raro i te rarangi tuarima ki taku whakaaro e kore e tiakina nga take a te hunga tokoiti, tera e murua tonutia nga take a te hunga tokoiti. E tino he ana enei rarangi ki taku whakaaro a ka tono atu ahau inaianei ki te rangitira nana tenei pire taria e tino whakamana i enei rarangi me kaua e tau tetahi tikanga pai ki nga Maori.

Te Hetana.—Kua ki ake nei ahau ekore e korerotia tuatorutia tenei Pire i tenei po a tera ahau e kite i taua rangatira i mua o te korerotanga tuatorutanga a ka pai ahau ki te whakatikatika i etahi rarangi mehemea e ngawari ana nga tono.

Taipua.—E pai ana ahau ki tena tikanga i runga i te whakaaro tera e menemanatia e te Whare o Runga tetahi menemana hei whakarite i aua he. I peratia ano te tikanga mo te Pire Whenua, erangi kahore ano ahau i rongo he pehea te tukunga iho kua whakaaetia ana nga menemana.