.gif)
Nga Korero Paramete: 1891-1895
Turei, te 9 o Akuhata, 1892
Turei, te 9 o Akuhata, 1892.
Takiwa Raihana Moao Whango Me Riuopuanga.
Taipua.—Patai ana ki te Minita Maori mehemea tera e tahuri te Kawanatanga ki te arai i te mahi hokohoko Waipiro i taua takiwa, ta te mea he takiwa Maori motuhake taua wahi a kei te whakahe nga Maori ki te mahi tuku waipiro ki reira? E hiahia ana ia kia rongo mehemea he pono te kupu, kua whakaaetia he raihana ki taua wahi. Ki te mea he pono, kati, i hoatu taua raihana i runga i te whakahe a nga Maori. Na nga tangata o taua takiwa i tono ki aia kia pataia tenei patai.
Te Karimana. — Kahore ano kia tuku raihana te Kawanatanga mo taua wahi, e ai tona mohio, a me matua tuku tono mai nga Maori ki te Kawanatanga, katahi ka puta he raihana. Ko tenei kahore ano kia tae mai he tono pera, ma te tae mai, katahi ka ata whakaarohia.
Te Waka Poraka.
Taipua.—Patai ana ki te Minita Maori ka pewhea tana mahi mo te pitihana o Kipa Te Whatanui mo te Poraka o Te Waka i ripoatatia i te Komiti Tikanga Maori i te tau 1890? I mahia tenei tikanga i runga i tetahi pitihana i kokiritia ki te Whare, a ahua raruraru ana taua whenua a whakaotia ana e taua Komiti taua ripoata. Kanui tona hiahia kia tohu tohu mai te Kawanatanga i to ratou whakaaro mo tenei mea.
Te Karimana.—Ko tenei mea e rite ana ki te tono whakawa tuarua ki Te Kooti Whenua Maori, a kahore i whakaaetia te kereme o te Kaitono, kua oti i te Kooti te whakahaere i tana mahi tutuki noa ki tona mutunga.