Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1891-1895

Nga Komihana Ture Whenua Maori

Nga Komihana Ture Whenua Maori.

I runga i te motini kia pootitia tetahi moni mo nga "Whenua Maori £2,091." Te HATIHANA kua kite ahau kei roto i tenei moni tetahi moni e £850 i pau i nga Komihana Ture Whenua Maori apiti atu ki tetahi £300 kua oti te whakarite i te tuatahi. E patai ana ahau mehemea ka utua tetahi wahi o tenei moni ki tetahi mema o te Paremete.

Te Karimana kua whakamaramatia e ahau tenei putake i te tuatahi a meingatia ana e ahau te £850 hei whakarite i nga moni katoa i pau i aua Komihana. Muri iho i te taenga mai o nga kaute kua nuku ake te moni kua pau ara kua eke ki te £1,100 a he moni whakakapi rawa tenei.

Te Hatihana.—Me whakaatu mai te Minita mehemea ka huia ki tenei tetehi utu kua utua ki tetahi mema o tenei Whare?

Te KARIMANA.—Kahore he utu ke atu kia hoatu ki aua Komihana heoi anake ko tera kua oti te whakaatu i te tuatahi, ara te kotahi pauna me te kotahi hereni mo te ra, a i whakaritea e ahau e £300 hei whakaoti rawa i nga kaute katoa kihai i tae ake i te tuatahi na te matenga o Tamati Make i roa ai.

Te Piha.—E pa ana nga Ture o nga mema Paremete ki aua Komihana, ara te Ture whiu mema o te tau 1878. Heoi pea te moni i puta ki aua mema ko te moni i pau mo a raua haerenga.

Te Karimana.—Ki toku mohio ko era moni anake kua oti te homai te pukapuka ki te aroaro o te Whare.

Te Hatihana.— Ki taku mohio heoi te moni i puta ki aua Komihana e mema ana o te Whare nei ko a ratou moni anake i te haereretanga a e tika ana kia marama rawa tenei mea ki te motu katoa kei kiia kua hara aua mema i raro i Te Ture Whiu Mema.