Pire Pane Kuini

Tame Parata.—E whakatika ake ana ahau ki te tautoko i tenei Pire no te mea e uru ana etahi tikanga ki roto i nga rarangi e tau ai te pai ki nga Maori a ki takau whakaaro he mea tika kia whakaekea te taake ki runga i era e purei ana ra roto i te totaraiheita. Ko nga moni a aua tangata e rukerukea ana ki taua purei a he mea tika kia tangohia mai etahi hei whakamama i te kaki o te koroni. E hiahia ana hoki ahau ki te mihi atu ki te Kawanatanga mo ta ratou tukunga mai i tenei Pire me nga rarangi e pa ana ki nga Maori no te mea ka maha nga tau kua hori nei e utu ana nga Maori i nga tiuti kihai nei i tika kia utua e ratou ara te utu i te 10 paiheneti i runga i a ratou riihi. E tino mohio ana hoki ahau ma te whakakorenga o taua utu e nui ai te riihi i nga whenua Maori a ma reira e whai ngako ai nga Pakeha me te koroni hoki. He maha hoki nga Rahui Maori o te Waipounamu katahi ka riihitia i runga i te mea kua whakamamatia te punga. Kotahi te keehi e tino whakaaturia e ahau. I whai whenua etahi o nga Maori i Ashburton a whakaae ana tetahi Pakeha ki te riihi i taua whenua no muri iho ka kite ia tera e tae aua tiuti i runga i taua whenua ki te £600 mehemea ka tangohia e ia taua whenua mo nga tau e rua tekau matahi heoi rere mai ana te wehi ki taua Pakeha a whakarerea ake a no reira mai ano i takoto huhua kore ai taua whenua a taea noatia tenei wa. Ka wha tau ahau e kakari ana kia whakarereketia nga utu o taua tiuti. Heoi kua koa taku ngakau inaianei i te mea tera e oti taku i hiahia ai. Mehemea ka whakarereketia he nui te painga e tau ki nga Maori o Aotearoa hoki.