.gif)
Nga Korero Paramete: 1891-1895
Taite, te 16 o Hurae, 1891
Taite, te 16 o Hurae, 1891.
Te Rori Ki Te Waotu.
Taipua.—Patai ana mehemea ka pai te Minita mo nga mahi nunui i te tika kia whakamahia kia whakaotia te rori e ahu atu ana i Te Waotu ki te piriti i Te Arapuni. I pataia tenei i runga i te tono a Rongowhitiao. I homai e tera Kawanatanga i tetahi moni hei whakaoti. Otiia kaore i whakamahia, na reira e tono ana ia kia maharatia tenei mea.
Ko Mekenehi.—Ae ka whakaritea tetahi moni hei hanga i tenei rori ta te mea he tino huarahi tenei. Ko te moni tuatahi kua whakapaua mo tetahi atu mahi nui.
Rahui Kura Maori Motueka.
Tame Parata.—Patai ana ki te Minita Maori ka pewhea te mahi a te Kawanatanga mo te rahui kura i Motueka. He maha nga tau e mauria mai ana tenei take ki te Paremete. I te wa e tu ana tera Kawanatanga i whai kupu ratou kia whakaarahia he keehi ki roto ki te Hupirimi Kooti. E hara i te mea kotahi tonu te whenua e penei ana erangi tera atu kei Wairarapa kei Whanganui me etahi atu wahi. He take nui tenei, a e tika ana kia whakahokia enei whenua ma nga Maori ano e whakahaere.
Te Karimana.—Kua tirohia e ia tenei mea, a kihai i rite te tikanga tiaki. He patai nui rawa tenei inahoki he tini noa atu nga keehi penei kei nga wahi katoa o te koroni. I tae mai ano te reta a te honore mema a patai ana kia Ta Hori Kerei, koia hoki te Kawana i te wa i hanga ai aua rahui, a ki tana whakaaro ko te mea tika me ata uia taua mea. A kei te mutunga o te Paremete ka tino whakaoioitia taua take e ia i te mea hoki he tino he rawa atu te takahanga o nga ritenga i rahuitia ai taua whenua.