Manutahi Poraka.

Timi Kara.—E patai ata ana ahau ki te Minita Maori kua pehea ara. Mehemea e tika ana kia whakahaerea tetahi tikanga pera me te ripoata a te Komiti Mo Nga Mea Maori mo runga i te pitihana a Eru Pahau No 286 me etahi atu o te Paremete kua hori nei mo runga i Manutahi Poraka?

Te Miterehana.—I ki atu ano ahau i te Paremete kua hori nei tera ahau e haere ki te Tai Rawhiti a ka whai kupu atu ahau ki nga Maori i runga i taua whenua tonu. Na kua oti i ahau te whakarite i era kupu aku, a whakaaro ana ahau i runga i te mea i tukua taua whenua ki te Kawanatanga mo tetahi tikanga ake, a kihai i whaka-haerea i runga i nga tikanga i tukua ai taua whenua, ki taku whakaaro he mea tika kia whakahokia te wahi nui o taua Poraka te katoa ranei o taua whenua ki nga Maori. I au i reira i mahara ahau ka ahei te Kawanatanga te whakahoki i taua whenua a kia kaua e hanga he Ture e te Paremete hei whakahoki, erangi inaianei kua ui atu ahau ki te Roia o te Karauna ki ana whakaaro mo runga i taua poraka a mea mai ana ia ekore e ahei te pera erangi me hanga marire he Ture e te Paremete ka tahi ka taea ai te whakahoki. Ki taku whakaaro ekore e taea te hanga tetahi Ture mo taua mea i tenei Paremete. Erangi kua mea te Kawanatanga me whakahoki te nuinga o taua poraka ki nga Maori a ka whakahaerea he tikanga a muri ake nei hei whakaoti i taua take.