Te Miterehana.—I mea kei te mohio pea te Whare ki te mea e korerotia nei e te mema mo Akarana. I tino korerotia tenei take a pau katoa tetahi ahiahi o te Whare e korero ana. He tika ano ia ta te mema mo Akarana e korero nei ara he tokomaha nga kaumatua Maori, i roto i taua iwi a he maha a ratou kiinga mai ki ahau me te Tiati Tumuaki kia tu te Kooti ki Moaowhango kaua ki Matene. Kei te mohio ano pea nga mema kei to Tiati Tumuaki tonu te tikanga ki te ki kei te whea wahi te Kooti tu ai. He mea kihai i taea te arai te tunga o taua Kooti i te makariri, a he tika ano hoki tenei mehemea i kawea to Kooti ki Moaowhanga kua pera ano te roa o te haerenga o nga Maori e noho ki te taha ki Poneke o te Maunga i Rangitikei me Turakina. A i te mea ko ratou te hunga tokomaha e whai take ana ki Awarua Poraka a kua neke ke te mate ki runga i a ratou mehemea i nukuhia te Kooti ki Moaowhango a kaua a Matene. I tukuna mai e te mema na te waea ki ahau i tae mai ki aia i te ahiahi o nanahi nei he tono ano ki au kia whai page 28kupu ahau ki te Tiati Tumuaki kia nukuhia te Kooti ki Moaowhango a i muri tonu iho o te taenga mai o taua waea ka tukuna e ahau ki te Tiati Tumuaki a ki mai ia kei te tuku patai ia mo taua mea ki nga Tiati o te Kooti.