Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Te iwi O Ngatiapa

Te iwi O Ngatiapa.

Taipua.—E patai atu ana ahau ki te Minita Maori ka peheatia e ratou te tono a te Komiti mo Nga Mea Maori mo runga i te pitihana a Aperahama Tipae me te Iwi o Ngatiapa i tukuna ra te ripoata i te Paramete kua hori nei. He patai atu taku kua peheatia taua ripoata a te Komiti mo runga i te pitihana e tono ana kia whakawakia tuaruatia tetahi poraka whenua no Aperahama Tipae. Me korero atu e ahau te ripoata a te Komiti mo runga i taua whenua koia tenei:—

"No te iwi o Ngatiapa nga kai-pitihana a e ki ana e whai take ana ratou i runga i te take tupuna ki tetahi whenua nui e takoto ana i waenganui o Whangaehu me Turakina a i wehea taua whenua kia 18 nga poraka a i te whakataunga a te Kooti Whenua Maori whaharereketia ana te whakataunga mo te poraka i uru ai nga kai-pitihana ki etahi atu o aua poraka a kua tau tetahi mate ki nga kai-pitihana i runga i taua whakataunga. E inoi ana ratou inaianei kia whakakorea taua whakataunga me te whakataunga a te Tiati Tumuaki kia kaua e tukuna he whakawa tuarua.

"Kua whakahaua ahau kia ki penei: (1.) Kua kitea e tika ana nga korero o roto i te pitihana. (2.) Me whakawa taua keehi e te Kooti Whenua Maori a me hanga e te Kawanatanga tetahi ture kia ahei ai te tu taua whakawa. (3.) Ki te whakaaro a tenei Komiti ko te huarahi tika me whakahaere te whakawa mo tenei poraka i runga i nga tikanga me nga ritenga Maori pera ano me te whakawakanga o era poraka tekau ma whitu i whakawakia i raro ano i taua Tiiti tuku.

"13 o Hepetema, 1889."

Te Miterehana.—He take tino raruraru tenei keehi. Kua roa ahau e whiriwhiri ana i tenei mea a kua pa atu ahau ki te roia whakahaere mo aua Maori me te Tiati Tumuaki hoki a kua mea ia ahakoa pehea te whakahaere o taua keehi ka tau he mate ki tetahi taha ki tetahi taha ranei o nga Maori. Heoi te huarahi hei whakahaere i taua mea ki taku titiro me hanga he ture mo taua keehi me pakaru ranei i te Karauna Karati. Kua mea ahau kia pa atu ano ki te Tiati Tumuaki mo runga i taua take kia whiriwhiria te whakahaere ara ki te whakahaerea. Erangi e tino mohio ana ahau ahakoa pehea te whakahaere tera e tau he mate ki tetahi taha ki tetahi taha ranei.