page 17

Pire Whakarite Kia Waru Nga Haora E Mahi Ana Te Ka1Mahi.

Taiwhanga.—E to Tumuaki e whakatika ake ana ahau ki te tautoko i tenei Pire me te whakaatu hoki i taku pai ki nga tikanga o roto i taua Pire. E tino miharo ana ahau ki nga whakaaro o era mema kua ki mat nei ka turaki ratou i tenei Pire no te mea ehara ratou i te hunga kimi mahi hei oranga mo ratou, heoi nei te he i kitea e ahau o te mema nana i kokiri i tenei Pire ko te tukunga mai o tana Pire i tenei Paremete, he mea pai rawa mehemea i waiho e ia mo tenei Paremete e haere ake nei ka kokiri mai ai. Ki taku mohio mehemea i tukua mai tenei Pire a tenei Paremete e haere ake nei, e kore te Mema mo Motueka e tahuri ki te turaki, no te mea tera e tupu he mahara i roto i te ngakau o taua memea meake tata nei te Pootitia ai nga mema mo te Paremete a tera hoki ia e haere ki waenga i taua hunga mahi o tona takiwa kimi ai i tetahi pooti mana. Ko ahau tonu tetahi o taua hunga mahi mo tetahi wa roa i Akarana, a tekau nga haora o te ra kotahi i tu ai ahau ki te mahi. Mehemea e mahi ana te mema mo Motueka kia tekau nga haora i te ra kotahi tera e aru mai ona whakaaro ki runga i aku, mo runga i tenei Pire. Heoi nei hoki aku whakahe ki tenei Pire kua puaki ake nei i ahau ara he mea pai mei waiho mo a tenei Paremete e haere ake nei ka kokiri ai i tenei Pire ki taku mohio mei peratia kua pooti katoa nga mema mo taua Pire no te mea kua tupu haere mai te whakaaro i roto i o ratou ngakau ki te kore ratou e pooti mo tenei Pire ka wehi ratou kei kore ratou e pootitia e aua hunga mahi erangi ko taku i tumanako ai kia whakahokia mai ara kia pootitia mai e taua hunga mahi ko nga tangata whakaaro pakari hei mema mo te Paremete, kahore aku whakahe ki nga mema o te Paremete erangi e whakahe ana ahau ki te hunga nana ratou i pooti mai, na a ratou pooti hoki i tae mai ai aua mema ki konei ki te hanga ture mo te koroni. Heoi ka whakamahara atu au ki nga kaipooti kua tata te wa e tu ai ano te pooti mema Paremete, a mehemea e hiahia ana nga kaipooti kia pai nga ture mo Niu Tireni, me whakahoki mai e ratou i nga tangata pai ki tenei Whare a muri ake nei. No te tukunga o taua Pire ki roto ki te Komiti pootitia ana, hinga ana taua Pire.