Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Pukekawa Poraka

Pukekawa Poraka.

Taipua.—E patai atu ana ahau ki te Minita Maori mehemea e mohio ana te Kawanatanga kua hokona tetahi whenua i Pukekawa e 800 eka he whenua i meatia hei kainga mo Ngatitamaoho. E hiahia ana ahau kia mohio ki nga tikanga o taua whenua. I te wa i tu ai a te Rata Porena hei Minita Maori i te tau 1873 i tukuna e ia kia noho nga Maori i runga i taua whenua, kihai ia i tino wehea taua whenua hei rahui Maori erangi i tukuna ki nga Maori kia ratou te tikanga o te roa e noho ai ratou i ruuga i taua whenua, a ki te whakarere e ratou ka tangohia mai ano e te Karauna ki a ratou. Ki taku mohio i nohia taua whenua e nga Maori mo nga tau te kau ma ono a kihai i whakarerea e ratou taua whenua. Na inaianei kua rongo ahau kua hokoua taua whenua e te Kawanatanga a kua ngaro katoa a ratou whakapainga.

Te Miterehana.—I whakaaetia e te Rata Porena kia haere a Ngatitamaoho ki runga i taua whenua noho ai i te tau 1873 i runga i enei tikanga me noho tonu ratou i runga i taua whenua. Kihai i maha nga tau e noho ana ratou i reira ka whakarerea e ratou no reira ka tukua mai taua whenua i raro i nga tikanga whakahaere o nga whenua o te koroni. Ko tetahi wahi o taua whenua i tae pea ki te rua rau eka kua nohia e te Pakeha inaianei, a nana ano taua whenua inaianei. Kua tuhi pukapuka ahau ki te kai-ruri ki te patai atu mehemea ekore e taea te whakawhiti mo tetahi piihi whenua ke erangi kahore ano he kupu kia tae mai a taua kai-ruri. Kua tono ahau kia tukuna mai tetahi ripoata whakaatu i te rahi me te wahi i takoto ai o nga whenua takoto kau katoa o te Karauna a i raupatu tia i Waikato. A ka oti tenei te tuku mai, a ka oti hoki te tuku mai e te Wirikihana nga ingoa o nga Maori e whai paanga ana ki taua mea tera e whakanonia nga Maori ki runga i tetahi whenua ke.