Te Pawuru.

Taiwhanga. — Patai ana ki te Minita o nga Ture mehemea ka mahi te Kawanatanga kia mauria mai a Pawuru te roia i oma atu i Akarana ki te kawhaki i te moni nui a Taurau Kukupa me etahi rangatira? Ka toru nga nohonga Paremete e whakaara ana ia i tenei patai. A e tino inoi ana ia kia whakaarohia tenei mea e te Kawanatanga. I tenei tau kua hori ake nei, ka rongo ia, e haere ana te Minita o nga Ture ki Merapane, tuhi reta ana ia ki taua Minita kia patai atu ia ki te Hekeretari o tera koroni, mei kore e taea te mau mai i taua roia ra. A i tuhi reta ano ia ki te Minita mo nga Ture i Merapane, whakahokia mai ana, kua patai ia ki te haihana o nga pirihimana, a kua ki mai tera, kei te mate tonu taua tangata ra. A tenei tana reta whakahoki mai.

"Tari Ture Karauna,
"Merapane, 4 Aperira, 1889.

"E Hoa,—Kua tohutohu mai te Minita o nga Ture kia whakaaetia atu te taenga mai o to reta o te 5 Maehe, he patai mai nau ki te ahua ora o Pawuru roia. Tenei te ripoata o te tari o nga Pirihimana a kua tukua atu hei mohiotanga mau.—Na to hoa,

"B. C. Harimana,

"Hekeretari."

"Tari Pirihimana,

"Merapane, 2 Aperira, 1889.

"Mo runga mo C. R. Pawuru.

"E whai honore ana ahau ki te whakaatu kei te huarahi ki Turaka te whare o taua tangata. I kite tonu ahau i taua tangata i tenei ra, a i toku nei mohio, he nui te mate o taua tangata. E hara i te mea kei roto i tona moenga e takoto ana, erangi e kore ia e kaha kia puta ki wako o tona ruma.

"Tamati Nikitini,

"Haihana."

Ko tenei keehi e rite ana ki nga keehi e rua o tera tau: e rua nga tamariki a nga tangata rawakore tokorua i mauria ki te whareherehere mo te Tahaetanga i etahi mea moroiti noaiho; a no te whakapaenga ki te tama a tetahi tangata whai rawa mo tetahi tino hara nui, whakakahoretia taua hara. Ko taua tangata nei ko Pawuru, he roia a koia hoki te Tumuaki o nga Tiati o te Kawanatanga o Whiti, imua. Koinei pea te take i ora ai taua tangata. Ko tenei kua pa he mate ki nga rangatira Maori i runga i te mahi tahae a taua roia, koia te take e mahara ana ia, me whakahaere taua tangata i raro i te Ture ona ritenga.

Te Pakuha.—Ki tana whakaaro, kua hoki te patai a taua mema e ia ano, inahoki e wkakaatu mai ana ia, i tukua taua take ki nga Pirihimana o Wikitoria, ki mai ana ratou, e kore e ahei te tuku mai ia Pawuru i runga i te ahua hauarea. A kaore te Kawanatanga e kaha ki te whakahaere i tenei mea, erangi kia tae mai he kupu hou i tawahi, katahi ra ano.