Title: Nga Korero Paramete: 1886-1890

Author: New Zealand Parliament, Legislative Council

Part of: He reo ture nō te taha Kāwana / Language of the Crown

Conditions of use

Share:

Whenua Whitau O Ngatiporou.

Meiha Ropata Wahawaha.— He patai taku ki te Kawanatanga, Mehemea ranei ka taea e te Kawanatanga te whakaaro te whakarite ranei etahi tikanga e ahei ai nga Maori o Ngatiporou ki te whakarite tikanga i runga i te riihi i tetahi atu huarahi ranei e taea ai te whakarite nga hiahia o nga Pakeha e hiahia nei ki te mahi i nga whitau e tupu ana i o ratou whenua papatipu? Ko te take i patai atu ai au i tenei patai, he hiahia no nga Maori o toku takiwa kia mahia nga whitau e tupu ana i reira, notemea hoki kaore ratou i ahei ki te whakarite tikanga e taea ai te mahi nga whitau o to ratou takiwa. Ko te take i kore ai ratou e kaha ki te mahi i nga whitau, he titiro no ratou ki te ahua o te ture e arai nei i a ratou kia kaua e whakahaerea he tikanga mo o ratou whenua e takoto papatipu ana, me to ratou whakaaro nui ki nga tikanga o te ture. Koia nei te take i patai atu ai au, kia ata whakaarohia e te Kawanatanga mehemea ranei e kore e taea te tuku mai tetahi tikanga e puare ai tetahi huarahi ki nga Maori hei mahinga i nga whitau e tupu ana i o ratou whenua papatipu.

Te Witika.—Ka ata whakaarohia e te Kawanatanga taua mea, kia kitea ai mehemea ranei tera e taea te whakarite he tikanga mo aua tu mahi.