Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Taite, te 30 o Akuhata, 1888. — Tauponuiatia Poraka

Taite, te 30 o Akuhata, 1888.
Tauponuiatia Poraka.

Hoani Taipua. —Ka whakatika atu au i ta te mema o Waipa i korero atu nei mo te Poraka o Tauponuiatia. Kua whaikupu atu ano au i mua mo te mate o aua tangata. I korero ano au mo runga mo te pitihana i tae mai ra ki te Whare. Me ata whakaaro te Kawanatanga mo runga mo tenei notemea hoki he whenua nui tera he maha hoki nga tangata e kereme ana. Te take i raruraru ai ko etahi o nga uri o aua tupuna kihai i tukuna mai ki roto ki te Kooti whaikorero ai. Heoi ano te tupuna i korerotia ko te taha kia Ngatituwharetoa. Ko te take i peratia ai na te mea na nga Kerehi tokotoru e pa nei kia te Heuheu. Na ratou i whakahaere pera notemea kua moe tetahi o ratou i te taumahinea Te Heuheu. Koi ra te take i hinga ai a Hitiri Te Paerata, i tono hoki ia ki tetahi taha o taua whenua. E whakaae atu ana au ki ta te mema mo Waipa kia tu he Komihana hei whiriwhiri i te mate o aua tangata. Kua kahititia e etahi o aua tangata i hinga ra ta ratou tono kia whakawakia tuaruatia ano. I uru ano te ingoa o Taonui, engari kua tono ano ia kia tu he whakawa tuarua. I tinihangatia ia e etahi Pakeha no reira kihai ia i tae atu ki te Kooti i Taupo. I puritia ia ki te Kooti whakawa Hara i Kemureti, he mea tamana kia kore ai ia e tae atu ki te Kooti. No to ratou mohiotanga iho e kore ratou e tae wawe atu ki te Kooti Whenua Maori katahi ka patua atu he waea i Kemurete he tono kia nukuhia te whakawa kia tae atu ai ratou, kihai page 99te Kooti i whakarongo. Ki taku mohio mehemea na Hohua Hoani te waea kua hohoro tonu te tahuri o te Kawanatanga ki te mahi; engari kihai i whakaarohia notemea hoki na nga Maori, ahakoa he mea tika ano kia whaiwhakaarohia. Ki taku mohio mehemea ia na tetahi wahine Maori i moe i te Pakeha i Poneke nei kua hohoro tonu te mahi, e rongo ana hoki au ko ana tono katoa e whakaaetia tonutia atu ana. Kaua te Tari Maori e tahuri ki te mahi huna i nga mea e tonoa aua e etahi tangata. Ko nga mahi a taua tari e rite ana ki te waha taniwha e tahuri ana ki te kai i te whenua. Kei te pera te mahi a taua tari i Poneke nei. Ki au nei he mea pai ke kia whakakore atu taua tari, kei mahi pera tonu. E tino hiahia ana au kia whakaaetia e te Kawanatanga te tono a te mema mo Waipa, notemea e mate nui ana taua takiwa.

Whakaaetia ana te motini a Meiha Tiakihana kia perehitia nga whai korero a Hitiri Te Paerata i korero ai ia ki te aroaro o te Komiti Maori.

Whakamutua ana te Paramete.

H eoi Ano, Ka Mutu

page breakpage breakpage break