Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Pire Maina

Pire Maina.

Tame Parata.—E hiahia ana ahau ki te patai atu ki te Minita mehemea kua whakapuaki korero te Kaitiaki o te Katoa mo runga i tenei Pire, no te mea e pa nui ana tenei Pire ki nga Maori i te takiwa o Kereimauta.

Te Retihana.—Kahore te Kaitiaki o te Katoa i whakapuaki korero mo runga i tenei Pire erangi kua tukuna atu he kupu ki aia, a kei te mohio ia ki te huarahi e whakahaerea nei e te Kawanatanga mo runga i tenei take. Erangi ka ki atu ahau ki te mema na kahore he tangata pai ke atu i te Kaitiaki o te Katoa hei whakahaere i aua whenua, a kei te ata tiakina e ia.

Tame Parata.—Ehara taku i te turaki i tenei Pire i runga i te ngakau riri erangi e turaki ana ahau i runga i nga take a nga tangata nana ahau i Pooti mai. He hiahia hoki taku ki te whakaatu i taku rnahi tiaki e nga take a toku iwi Maori. Ehara anake hoka taku i te tiaki i nga take a toku iwi erangi he whakaaro naku he Pire kino tenei Pire a tera e tau he mate ki etahi atu whenua maina, haunga a matou. Ki taku whakaaro e hara rawa tenei i te Pire tika hei mau mai ki roto i tenei Whare. Kua oti te ki ka tiakina nga take a nga Maori e te Kaitiaki o te Katoa. Na mehemea kahore te Kawanatanga e whakaae ki nga utu i tonoa e te Kaitiaki o te Katoa ma wai e whakatau i muri iho. Tera e tukuna ma tenei Tiati kotahi e whakatau. Ko tona tukunga iho tena. Kahore au e mohio ki te take i kore ai nga mema nana i tautoko i tenei Pire i kore e whakahe ki nga Ateha i mua. Ki taku mohio e tautoko matapo ana nga mema nana i tautoko tenei Pire, kahore i mohio ki ona tikanga erangi kei te kuare noaiho. Ka whakamahara atu ki te Whare, ki te ara mai tetahi raruraru a muri ake nei i runga i te paahitanga o tenei Pire. Ka tau te he ki nga mema nana i tuku mai i tenei Pire kino.

Te Tanapuru.—Heoi te mahi a nga mema Maori he whakatika he ki mai ki te Whare tera e puta mai tetahi raruraru. E hiahia ana ahau kia tino mohio he pehea te ahua o enei raruraru e whakawehiwehi nei ratou i te Whare.

page 55

Te Tiamana.—Ehara tenei i te take hei whakamahara ki te Whare.

Tame Parata.—Ki taku whakaaro he mea tika kia whakahe ahau ki tenei Pire, a ki te kitea a muri ake nei i he ahau e pai ana ka tau ano te he ki au. Ki taku whakaaro ehara taku i te whakahe i toku tunga e tu nei ahau hei mema mo tenei Whare. E mahara ana ahau he mea tika ano kia whakahe au ki tenei Pire ara mehemea e mahara ana ahau e he ana. Ko tenei ekore ahau e whakaroa i te Whare i te mea kua puta taku whakahe mo te taha ki nga Maori o nga Motu e rua.

Taiwhanga.—Ka tautoko ahau i nga korero a te mema kua noho nei ki raro. Heoi taku hiahia kia puta mai te ra e tukuna ai e tenei Whare me nga Pakeha katoa tetahi ture pai mo nga Maori. No te mea kahore nga rawa he mana o te iwi Maori i raro i nga ture e hanga ana e te Pakeha. Meake tata nei te haere hemo kai ai nga tamariki Maori i nga tiriti. Mehemea kahore nga mema Maori, e tiaki i nga take a nga Maori no ratou ano te he.

Timi Kara.—Ae ma te Pire whakaora i nga Maori te ora ai.

Taiwhanga. — Kua mea te mema nei ma te Pire whakaora Maori te ora ai. Erangi kahore ana whakaaro e tau ki runga e nga Maori, kei tetahi taha anake. Ko taku hiahia ki te tae tenei Pire ki te Whare o runga ka pai me ka whiua atu e ratou ki waho.

Heoi whakaaetia ana te motini whakaaetia ana hoki te menemana a korerotia tuatorutia ana te Pire.