Taite, te 2 o Akuhata, 1888.
Nga Kereme Maori O Te Waipounamu.

H. K. Taiaroa.—E te Tumuaki. He maha nga taenga atu o enei take ki nga Komiti whiriwhiri, he mema ano hoki au no aua Komiti. He take nui rawa tenei, no mua mai ano kua tae hoki ki te rua ki te toru whakapaparanga, a i whakatu ano te Kawanatanga i etahi Komihana i nga wa kua pahure ake nei hei whiriwhiri i aua take. I whakaturia hoki a te Mete raua ko te Neana hei Komihana, me te hoatu kia rua tau hei mahinga ma raua hei whiriwhiringa i nga take ka tuku ai i ta raua ripoata; a kaore ano i oti ta raua mahi ka whakamutua to raua Komihana. Mehemea i waiho e te Kawanatanga kia whakaotia ta raua mahi kua taea e raua te tuku mai ta raua tino ripoata mo aua take katoa. Na wai i whakakore taua Komihana, ko te Paraihe te Minita mo te taha Maori ko te Hooro te Pirimia. Kua puta noatu te whakaaro o te Hooro e whakahe ana i nga kereme a nga Maori, na kua whakaturia ano ia hei mema mo tenei Komiti. I tuhituhi ano hoki ia i tetahi pukapuka whakahe mo te taha ki nga Maori hainatia ana e ia tona ingoa hei riiwhi mo te ingoa o te Kawana. E whakahua atu ana au i enei kupu notemea e kiia mai ana e kore au e tika mo runga mo tana Komiti notemea e whaipaanga atu ana au ki aua take. Kaore aku tino hiahia mo aua tikanga mehemea kua mahia tikatia nga ritenga o taua hoko heoti ano taku i hiahia ai. I whakaturia taua Komiti nei hei whiriwhiri i nga kupu whakaae a te Kawanatanga kihai nei ano kia whakaritea. Ki taku whakaaro e hara i te mea tika kia whakaturia e te Kawanatanga he Komiti hei whiriwhiri i o ratou ake mahi. Mehemea e pena ana ahau kua tahuri au ki te whakarite i aku kupu whakaaetanga, mehemea hoki ka puta he kupu whakaae maku ka mahara au he mea tika maku ano e whakaea. Engari ko enei kaore ano kia whakaritea e te Kawanatanga. I whakaturia ano a te Make e te Kawanatanga kia tuhia mai e ia tana ripoata mo ana mea i mohio ai me nga mea e kitea ana e ia mo runga mo aua putake. Ki taku nei e hara i te mea tika kia whakaturia he Komiti e te Kawanatanga engari ano te mahi mai he Pire hei whakaea i a ratou kupu whakaaetanga. I tono mai ano te Tiamana o taua Komiti kia haere atu au ki te whaikorero, a tae atu ana au, engari pea e hara i te mea na te Kaunihera i whakaae. I ki atu ano au ki te Tiamana e kore e taea e au te korero atu aku mea katoa i mohio ai kia tae mai ra ano aku pukapuka i Otakou. I ki atu ano au ki te Tiamana he mea tika kia karangatia e te Komiti a te Make, a te Keepa a te Neana raua ko te Mete me Ta Hori Kerei ko ia hoki te Kawana i taua wa. Ki taku mahara hoki he mea tika kia ata whakaarohia nga whaikorero i whakapuakina ki te aroaro o te Komihana o te Mete raua ko te Neana.