Paraire, te 8 o Hune, 1888.
Te Kooti.

Meiha Ropata Wahawaha.—I patai ki a te Tiwini, Minita. Mehemea ranei ka tahuri te Kawanatanga ki te whakamutu i te haerere o te Kooti me tona ope nui ki Opotiki me era atu kainga i te Tai Rawhiti e pa nui nei te mate ki nga tangata Maori o aua kainga? Ko te take o taku patai nei mo Opotiki me etahi atu kainga o te Tai Rawhiti, e mate nui ana nga Maori o aua kainga i te pau o a ratou kai i aua ope nui a te Kooti e haerere nei i aua takiwa. I hiahia ano nga Maori o aua takiwa kia tahuri te Kawanatanga ki te whakamutu i taua mahi, a tenei ano ta ratou pitihana mai kua tukua mai ki Poneke nei. Ko nga tangata o aua kainga e iti ana e tae pea ki te tekau ma rima ki te rima tekau tangata o ia kainga, kaore e nui ana ta ratou mahi kai. Kei te nui rawa nga ope o te Kooti e haerere nei e puta ana hoki ki te tahi rau rima tekau tae atu ki te rima rau ki te whitu rau, a ka tae atu ratou ki nga kainga kaore nga tangata e kaha ki te tao mai i nga kai a ka tahuri ano taua hunga ki te mahi mai i nga kai ma ratou. Ko nga tangata o nga kainga e mate kore kai ana a ka riro aua ope nei ka tahuri ratou ki te mahi mai i nga kai o roto o te ngaherehere. Ki taku mahara e whaitikanga ano te Kawanatanga ki te whakaaro mo enei mahi a te Kooti, i a ia e haerere nei, kaore nei he tikanga o ana haere, engari he mangere no ratou ko ona hoa ki te mahi kai ma ratou. Kei te mohio ano au ki tenei iwi kia te Urewera he iwi mangere, ko a ratou ngakinga kai kaore i te rahi atu i te whare e noho nei tatou. Koia nei nga take i patai atu ai ahau i te patai nei.