Paraire, te 17 o Akuhata, 1888.
Nohoanga O Etahi O Nga Mema.

H. K. Taiaroa.—E te Tumuaki i au ka korero atu nei mo runga mo tenei putake kua tukua mai nei ki te Kaunihera, me ki atu au kaore aku mauahara ki nga mema e korerotia nei to ratou rnohoanga ikonei. Kei te aroha atu au kia ratou i te putanga ake o tenei korero mo te tika mo te he ranei o to ratou noho ikonei. I puta ake ano he korero penei mo toku nohoanga ikonei i mua he mea patai na te Witika a whakahengia ana au. I puta atu au ki waho o te Kaunihera, tukuna atu ana ma tetahi Komiti Whiriwhiri e rapu mai te tikanga; mai ano i reira tae mai ki naianei kaore ano au kia mohio he aha ra toku he. Ki taku titiro i nui ke atu te he o enei mema i toku mehemea ra i he; ki taku mahara he mea tika kia ata rapua e te Kaunihera enei mea; engari ko te mea tika me mahi ki te tare, me mahi mai he ture hei whakatika. I muri tata iho i te whakakorenga o toku nohoanga ikonei, ka he a te Paratini kaumatua i runga i tana mahinga i tetahi mahi he, a i mahara ano te Kaunihera i reira kia mahia he ture hei whakatika i a ia, ki ana ano etahi mema e kore e pai kia whakatikaia tona nohoanga i te mea kaore ano kia mahia he tikanga pera moku; ko te take i whaikorero atu ai au inaianei kaore ano kia whakatikaia toku he mehemea ra ia i he au. Kaore hoki i mahia mai he Ture hei whakatika i au. Kaore hoki i utua mai he moni mo taku mematanga i taua wa. I kiia i reira kaore i tika kia utua mai ki au ana moni notemea i he taku nohonga i roto i te Kaunihera: kei te puritia tonutia aua moni. Ko taku noho e noho nei au no runga ke i te mana o te karangatanga houtanga mai i au, engari ko toku heenga kaore ano kia murua, no reira au i mahara ai me whaikupu au ki te Kaunihera, i te mea hoki kei te takoto tonu mai i taku aroaro tera heenga oku. Engari me ki atu ano au kei pohehe mai hoki, kaore rawa oku mauahara, e hara tera i te take i whaikupu ai au ki te Kaunihera; a ki te tukua mai he Pire inaianei hei whakatika i a ratou he aha te mahia ai hoki he oranga moku, me te whakaaro mai hoki ki aku moni i pau i taua wa. Kaore ano au kia mohio he aha ra toku he, engari mehemea i he na te Kawana ano te he ki te karara mai i au ki te Kaunihera.