Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Taite te 24 o Nowema,1887. — Reriwe O Te Waipounamu

Taite te 24 o Nowema,1887.
Reriwe O Te Waipounamu.

Hirini Taiwhanga.—E te Tumuaki, e whakatika ana ahau ki te tautoko haunga i tenei reriwe anake erangi i nga reriwe katoa o Niu Tireni. Ko te take i tautoko ai ahau i tenei reriwe, no te mea ka wha ka rima ranei nga tau i muri iho i toku taenga mai i Ingarangi a i ahau i reira ka kite ahau i nga reriwe e rere haere ana i runga i nga Whare. Ko etahi i runga i te mata o te whenua, na ki taku whakaaro na nga reriwe i nui ai a Ingarangi. A mehemea e hiahia ana nga mema o te Whare nei kia nui a Niu Tireni (ara) kia rite ki Ingarangi te rahi me anga tatou ki te mahi i nga reriwe. Kei nga wahi hoki e whai reriwe ana kei reira nga tangata. A mehemea kei reira nga tangata, kei reira nga moni, Kahore aku mea ki nga Maori ta te mea kahore ratou e mohio. Erangi nga mema o tenei Whare e mohio ana, ki taku whakaaro me tahuri nga Maori me nga Pakeha katoa ki te whakariterite i o ratou whakaaro kia hanga nga reriwe puta noa i Niu Tireni, puta noa i nga motu e rua, a ekore e roa kua wini nga reriwe. Ko te take tenei i whakatika ai ahau ki te whakapuaki i enei korero aku, heoi ka ki atu ahau tukuna tenei Pire kia paahi, ta te mea ka rima ka ono nga wiki i noho ai tatou i konei a kahore ano i oti noa tetahi mahi ia tatou.