Te Motini A Meihana Atikini
Kia Whakanekehia Te Paremete Mo Te Rua Wiki.

Hirini Taiwhanga.—E te Tumuaki i tonoa mai ahau ki konei e te iwi Maori ki te tono atu ki te Whare kia hanga he Ture pai mo nga iwi e rua i Niu Tireni, ka rua te kau nga tau o nga Maori e hiahia ano kia mohio awhea koutou hanga ai i nga Ture pai mo tenei whenua, kei te whawhai koutou inaianei, e whawhai ana te taha turaki ki te Kawanatanga, me te Kawanatanga ki te taha turaki, heoi e hiahia ana nga Maori kia mohio ratou a whea koutou hanga ai i nga Ture pai mo ratou, E mea ana ratou ki te kore e taea e koutou te hanga he aha te tukuna mai ai ma matou e hanga? I ki mai nga Maori ki au i mua he Ture kino nga Ture Pakeha, E ki ana hoki te iwi o Tawhiao me nga Maori katoa he Ture kino nga Ture Pakeha, ko au ia e mea ana he Ture pai nga Ture Pakeha, Kahore he iwi o te ao e rite ana te pai o nga Ture ki nga Ture o Ingarangi, Otira heoi te mea e hiahiatia ana he tangata pai hei whakahaere pai mo nga Maori me nga Pakeha, mo nga whenua Maori ia te mea i tino hiahiatia ai, ko to matou raruraru nui hoki i konei ko nga whenua, ko te take nui rawa hoki tenei o Niu Tireni, ki te kore e whakakorea enei Ture e mana nei i naianei mo runga i nga whenua ekore e taea te whakakore i nga raruraru i waenganui i te Maori me te pakeha, na konei nga Maori i tono mai ai i au ki konei kia inoi atu ki tenei Whare kia hanga he Ture pai a muri ake nei, na kua tae mai nei au ki te hanga Ture ma ratou.