.gif)
Nga Korero Paramete: 1886-1890
Mema O Te Kaunihera
Mema O Te Kaunihera.
H. K. Taiaroa.—E hiahia ana ahau kia whakamaramatia mai tetahi mea ara mo tetahi kupu i rongo nei au mo etahi o nga Mema honore o tenei Kaunihera. E hara i te mea e ngakau kino ana ahau ki aua mema, engari he mahara ake naku he mea tika kia ata whiriwhiria. Ko nga mema i whakahuatia ko Te Watarauhi, Te Oriwa, Te Paratini, Takuta Mengi, me te Homu, me tetahi atu mema kua wareware ake i au tona ingoa. I taku rongonga i nga kupu mo te noho a aua Mema i tenei Kaunihera ka mahara ake ahau ki toku nohonga i tenei Kaunihera i mua. I whakakorea atu toku nohonga i roto i te Kaunihera nei, e hara i te mea noku te he i whakakorea atu ai toku nohonga i taua wa; a no toku rongonga i nga kupu whakakino mo toku ingoa me te whakahe i toku noho i roto i te Kaunihera, puta ana ahau ki waho o te Kaunihera. Ki taku mahara he mea tika tenei kia whiriwhiria e te Kaunihera. Kei te korerotia enei mea i waho a kua panuitia hoki ki te nupepa o te ata nei. Engari me ki atu au ki nga mema kua whakahuatia ake nei e au kaore oku mauahara kia ratou kahore hoki oku hiahia kia pa he mate kia ratou, kaore hoki au i te pai kia rongo au ki o ratou ingoa e korerotia kinotia ana, pera me toku ingoa i korero kinotia ra i mua, kaua ratou e pohehe he ngaku kino noku i patai atu ai au i enei tikanga. Otira kei te mohia ano ratou ki nga mea e korerotia atu nei e au. Heoi ano ra taku kua whakamaramatia atu nei hoki e au ki te Kaunihera.