Taite, te 25 o Hepetema, 1884.
Ture Arai I Te Mahi Whakakino I Nga Kai.

H. K. Taiaroa.—Kaore au i te whakaaro nui rawa mo tenei Pire, mehemea ka inu nga tangata i te waipiro kino ka mate ratou no ratou ano te he. Te mahi a etahi Kai-tiaki Paparakauta kia rua nga ahua o nga waipiro kei roto i o ratou whare, ko tetahi ahua e hoatu ana ki nga kuare kia wawe ai te haurangi, ko te waipiro pai mo nga pakeha mohio. Kua rongo ahau i etahi Kai-tiaki Paparakauta o tenei motu e korero ana e rua ana ahua waipiro, kotahi ahua e karangatia ana he "Waipiro Maori," hoatu ana taua wai hei whakahaurangi i nga Maori, kaore au e whakahua i nga ingoa o enei tangata. Ki taku mohio ma te Kawanatanga e homai he Pire hei whakatika i tenei he. Tetahi ritenga pai me whakatu he tohunga tana mahi he haere ki nga Paparakauta katoa ki te kimi i te pai i te kino ranei o aua wai me haere a huna atu ki aua Hotera tango ai he wai me kore e kitea tona ahua. Mehemea ka penei te whakahaere katahi ka mutu te hoko o nga waipiro kua rongoatia. Ki taku hiahia me whakaro nui te Kawanatanga ki tenei mea.