Mane, te 30 o Oketopa,1905.

No te hawhe-paai i te rua karaka ka noho te Pika ki runga ki tona nohoanga.

Ka karakia te Whare.

Ka whakahaerea etahi mahi maha ka tae ki te Pire whakamutunga o te Paremete, e whakawhiwhia ai te Kawanatanga ki nga moni hei whakahaere i nga mahi katoa a te Kawanatanga mo te tau e haere ake nei. Ka mutu te tuatahi me te tuarua o nga panuitanga o te Pire, a no te motinitanga a te Pika kia panuitia tuatorutia te Pire ka tu ki runga ko—

Henare Kaihau (mema mo nga Maori o te Tai Hauauru).—He whakahe tana i te korenga kaore i paahitia te Pire "Horoi" e te Runanga Kaunihera, notemea he Pire tino whai tikanga rawa tera, a he mate nui rawa kua pa ki nga Maori puta noa i te koroni i te korenga o te Pire e paahitia e te Kaunihera. Me pehea koia e nga Maori te whakahaere i o ratou whenua ki te kore nga whenua e whakawhiwhia ki te taitara. Kei tona takiwa he nui atu i te rua miriona nga eka whenua Maori, a me pehea e ratou te mahi e puta ai he oranga ki a ratou i aua whenua? Ko te Pire i porowhiua nei te Kaunihera he mea ata whiriwhiri e te Komiti mo nga Mea Maori a paahitia ana e taua Komiti e tenei Whare hoki. He whakahe tana ki te Kawanatanga raua to te Kaunihera mo to raua ngakaukoretanga ki te paahi i taua Pire "Horoi" i te mea hoki kua paahitia e te Whare, a he aha ra hoki te take i tukuna ai e te Kawanatanga kia porowhiua e te Runanga Kaunihera. Ko te roanga o ana kupu aki i te Kawanatanga me titrio i Hansard.

Wi Pere (mema mo nga Maori o te Tai Rawhiti).—He whakamoemiti tana ki nga mema honore o te Whare mo ta ratou paahitianga i te Pire "Horoi," engari he nui atu tona riri mo te rukenga a te Runanga Kaunihera i taua Pire. He whakahe tana ki te Kawanatanga raua ko te Runanga Kaunihera mo te korenga e tautoko i taua Pire kia paahitia ai. Me titiro i Hansard te roanga atu o ana korero.

Honore Timi Kara (the Hon. Mr. Carroll), (Minita Maori).—Ka tu ake ki te whakamarama e hara i te Kawanatanga page 70te he i porowhiua ai e te Runanga Kaunihera te Pire "Horoi," engari na te nui o te taukumekume me te tautohetohe o etahi o nga mema o tenei Whare mo taua Pire i te wa e whakahaerea ana e tatou, a nui atu te taima i moumou, me te titiro mai me te whakarongo mai hoki o etahi o nga mema o te Runanga Kaunihera i taua mahi, no reira no te taenga ki te Whare Runanga, kua pau te taima, a kaore te Kaunihera i whai taima hei ata whiriwhiri i nga mea i kite ra ratou e tautohetia ana i roto i te Whare nei, a te tukunga iho maka atu te Pire ki waho. Tenei ano te roanga atu o ana korero me titiro i Hansard.

Raiti Honore Te Hetana (the Right Hon. Mr. Seddon).—Kaore kau aku kupu whakahoki, engari me penei atu au: ki toku whakaaro e tika ana te pouri me te amuamu o nga Maori mo to korenga i paahitia te Pire "Horoi," engari ka tere tonu taku whakaora i o ratou mate, i te mea a te tuunga o te Paremete e haere mai nei ka meatia e au ko te Pire "Horoi" tonu tetahi o nga Pire Kawanatanga e mahia tuatahitia.