No te hawhe-paahi i te rua karaka ka noho te Pika ki runga ki tona nohoanga.

Ka karakia te Whare.

Ka whakahaerea nga patai i te tuatahi. Ka oti nga patai maha noa atu e pa ana ki te taha Pakeha, ka tae ki te patai mo—

Kia Whakamaoritia Nga Ture Mo Te Ora O Te Iwi.

Hone Heke (mema mo nga Maori o te Tai Tokerau).—Ka patai ahau ki te Minita mo nga Tari Whakahaere i te Ora mo te Iwi, Mehemea ranei ka whakahaua e ia kia whakarapopototia nga Ture mo te Ora o te Iwi kia whakamaoritia hei matauranga mo nga Maori?

Te Honore ta J. G. Te Waari (Hon. Sir J. G. Ward, Minita mo nga Tari mo te Ora o te Iwi).—Ka whakahaua e ahau kia whakarapopototia aua Ture, a kia whakamaoritia hei matauranga mo nga Maori.

Nga Raruraru Mo Nga Whenua Maori.

Te Whiira (Mr. Field), (mema mo Otaki).—Ka patai ahau ki te Minita Maori, Mehemea ka whakaae te Kawanatanga i mua mai o te tuunga o te Paremete a tera tau, ki te whakatu i tetahi Roiara Komihana hei uiui a hei ripoata i te huarahi tino pai tino matau e whakaotia ai nga raruraru e pa nei ki nga whenua Maori, a hei uiui hoki a hei ripoata mai i nga mea katoa e puta ai he painga ki te iwi Maori.

Te Honore Timi Kara (the Hon. Mr. Carroll), (Minita Maori).—Ka ata hurihuria e te Kawanatanga nga kupu a te mema honore.

Hohipera Maori Mo Dargaville.

Te Haringi (Mr. Harding), (mema mo Kaipara).—Ka patai ahau ki te Minita Maori, mo a whea koe ka whakahaere tikanga e hangaia ai tetahi hohipera mo nga Maori, ki Dargaville ki tetahi wahi tata ranei ki o te Takiwa ki te Tai Tokerau.

Te Honore Timi Kara (the Hon. Mr. Carroll), (Minita Maori).—Kei te whakaaetia te tika o te whakaaro kia whakaturia he hohipera ki tetahi wahi e tutata page 45ana ki nga Maori o te Tai Tokerau; engari ko te mea e toe ana hei whiriwhiri, me pehea e taea ai te whakahaere pai me te whakawhiwhi ki te moni o taua hohipera. Otira maku e hurihuri tenei take.

Nga Tohunga Maori.

Te Herihi (Mr. Herries), (mema mo Pei o Pereti).—Ka patai ahau ki te Minita Maori, Mehemea ranei kei te whakahaerea etahi tikanga e peehia ai nga mahi a nga tohunga Maori.

Te Honore Timi Kara (the Hon. Mr. Carroll), (Minita Maori).—Heoi te utu mo te patai, ko ta te ture e whakaae ana kia mahia kei te mahia ko tera.

Haere tonu nga mahi a te Whare a no te hawhe-paahi i te rua karaka i te po ka hiki te Whare.