No te hawhe-paahi i te rua karaka ka noho te Pika ki runga ki tona nohoanga.

Ka karakia te Whare.

Ka whakahaerea etahi mahi a te Whare ka mutu, ka tae ki nga patai—

Maori Whai Whenua.

Te Rewi (Mr. Davey), (mema mo Karaihitiati) — Ka patai ki te Minita Maori,—(1.) Mehemea kua rongo ia ki tenei korero kua panuitia nei i roto i etahi nupepa i Niu Tireni: "Tera tetahi Maori waimarie i tae ki te Kooti Whenua Maori i tu ki Pamutana i mua tata ake nei, ona eka whenua kei a ia e mau ana i runga i tona take ake, e waru tekau rawa mano eka, me tona uru ano ki etahi atu poraka i tua atu i tena? (2.) Ka whakaaturia mai ranei e te Minita Maori e whia ranei nga eka whenua o taua Maori, a he tika ranei tera tetahi tangata Maori kotahi i neke atu i te waru tekau mano eka ona paanga whenua?"

Te Honore Timi Kara (the Hon. Mr. Carroll, (Minita Maori). — Ka whakautu; Kua kite to Minita Maori i taua korero i roto i te nupepa, engari kaore e mohio ana tera tetahi Maori i tae ki taua Kooti i tae ki tena waimarietanga, e waru tekau rawa nei mano eka whenua kei a ia. Kaore ano hoki te Minita e mohio ana ki tetahi tangata Maori kotahi i roto i te koroni nei i tae ona whenua ki te waru tekau mano eka, i tatata kau atu ranei ki tena ahua. Inahoki ra he takitahitahi rawa nga Maori i tae ki te kotahi mano eka i te tangata kotahi.

Te Akau Poraka.

Hone Heke (mema Maori mo te Tai Tokerau).—Ka patai ki te Minita Maori, Mehemea ka whakahaua ia kia whakamaoritia te ripoata a te Komihana mo te poraka o Te Akau, kia panuitia hoki taua ripoata ki roto ki te Gazette me te Kahiti, kia ahei ai nga Maori e paangia ana te mohio ki te aronga o te takoto o tena take, i mua atu i te whakahaerenga o tetahi atu mahi e pa ana ki taua whenua?

Te Honore Timi Kara (the Hon. Mr. Carroll), (Minita Maori).—Ka whakautu, He roa taua ripoata, a ka roa rawa hoki e whakamaoritia ana, e perehitia ana. Akuanei pea ka rite pea mehemea ka panuitia ki roto ki te Kahiti te whakamaoritanga o nga kupu tohutohu a nga Komihana; a ka penatia hoki.

Te Maihe (Mr. Massey), (mema mo Franklin).—Ka patai ki te Kawanatanga, Mehemea ka whakarite atu ratou ki nga Maori no ratou taua whenua kia tukua te katoa tetahi wahi ranei o Te Akau poraka hei nohoanga pupututanga ma te tangata?

Te Honore Timi Kara (the Hon. Mr. Carroll), (Minita Maori).—Ka whakautu, Ka tahuri te Kawanatanga ki te whakamatau atu ki te whakarite tikanga pai ki nga Maori e taea ai te whakanohonohoia a Te Akau poraka ki te tangata.

Haere tonu nga mahi a te Whare a no te hawhe-paahi i te wha karaka i te ata tu o te Paraire ka hiki te Whare.