Nga Korero Paremete: 1904-1905
Taite, te 18 o Akuhata, 1904
Taite, te 18 o Akuhata, 1904.
No te hawhe-paahi i te rua karaka ka noho te Pika ki runga ki tona nohoanga.
Ka karakia te Whare.
Ka whakahaerea etahi mahi i te tuatahi, a ka tae ki nga motini.
Nga Tukunga Whenua Maori.
I runga i te motini a Te Maihe (Mr. Massey), (mema mo Franklin), whakahaua ana, Me whakatakoto he ritaana ki te aroaro o te Whare e whakaatu ana i nga tono katoa kua tonoa ki te Kawanatanga ki te Tari Maori ranei kia whakaaetia kia hokona atu, kia hokona mai, kia riihitia, kia unuhia, kia whakarereketia ranei nga here, o nga whenua Maori i muri iho o te paahitanga o "Te Ture Kooti Whenua Maori, 1904," a me whakaatu taua ritaana—(1) i nga tono kua whakaaetia, nga ingoa o nga tangata i hoatu ai ena whakaaetanga, te ra i tonoa ai, me te ra i whakaaetia ai; (2) nga tono kua whakahengia, nga ingoa o nga tangata i whakahengia nei a ratou tono; a (3) nga tono e takoto mai nei i naianei kaore ano i whakahaerea, me nga ra i tae atu ai aua tono.
Reweniu Whenua Maori.
I runga i te motini a Hone Heke (mema Maori mo te Tai Tokerau), whakahaua ana, Me whakatakoto ki te aroaro o te Whare he ritaana e whakaatu ana i te huihuinga katoatanga o nga moni reweniu i riro i te Kawanatanga i runga i te Tiute Pane Kuini i runga i nga riihitanga me nga hokonga whenua Maori ki te tangata ra waho, mai o te tau 1862 tae mai ki naianei.
Huihuinga Nui O Nga Kaunihera Marae.
I runga i te motini a Tame Parata (mema Maori mo Te Waipounamu),wha-page 54kahaua ana kia whakatakotoria ki te aroaro o tenei Whare te ripoata o nga mahi a te Huihuinga Nui o nga Kaunihera Marae i tu ki Ruatoki i te marama o Maehe i hori ake nei, hui atu hoki ki nga ripoata motuhake o ia Kaunihera Marae kotahi puta noa i nga motu e rua o Aotearoa me Te Waipounamu, me nga pukapuka me nga tuhituhinga katoa e pa ana ki aua mea.
Whenua Mo Nga Maori Whenua Kore.
I runga i te motini a Tame Parata (mema Maori mo Te Waipounamu), whakahaua ana kia whakatakotoria ki te aroaro o tenei Whare nga ripoata a te Tari Ruri mo runga mo nga whenua i wehea mo nga Maori whenua kore o te iwi o Ngaitahu i Waiau, Lord's River, i Rakiura, Tautuka, me Wairaurahiri.
Ka haere tonu nga mahi a te Whare, a no te toru miniti i muri i te paahitanga o te tekau ma tahi karaka i te po ka hiki te Whare.