Tame Parata (mema mo nga Maori o Te Waipounamu). — Ka patai ki te Minita mo nga Mea Maori. Mehemea ka hanga mai e ia he rarangi ture hei whakatikatika i te Ture Kaunihera Marae, hei whakawhiwhi i aua Kaunihera ki tetahi mana whanui hei arai atu i te waipiro kia kaua ai e tae ki roto ki nga kainga Maori? Te take i whakanohoia ai e au tenei patai ki runga ki te Ota Pepa, e puta ana he tono i nga kainga Maori, i nga wa kua hori tata ake nei, kia hoatu he mana pera ki nga Kaunihera kia ahei ai ratou ki te arai atu i taua mea i te waipiro.

Te Honore Timi Kara (the Hon. Mr. Carroll, Minita mo nga Mea Maori). —Kua takoto te whakaaro a te Kawanatanga kia hanga he Pire whakatikatika i te Ture Kaunihera Marae e mana nei i naianei, kia tukua he mana whanui ki nga Kaunihera e ahei ai ratou ki te whakatutuki i nga hiahia o te nuinga o nga Maori i te koroni e mea nei kia whakamutua te mahi kai waipiro a nga hapu me nga iwi Maori.

Ka haere tonu nga patai a nga mema Pakeha mo etahi atu take, ka mutu era ka whakahaerea ko te Pire Patu Rapeti, ka mutu tera ka tahuri te Whare ki te mahi i—