Te Pika (Mr. Speaker) .—Ka ripoata ahau ki te Whare, i haere matou ko nga mema nana ahau i motini kia tu hei Pika, ki te Whare o te Kawana, koia enei aku kupu ki a ia:—

"E te Kawana, i runga i te whakarongo ki to kupu, a i runga hoki i tona ake mana, tahuri ana te Whare o te Iwi ki te whakatu i tetahi Pika mo ratou, a ko ahau ta ratou i whakatu ai, a tenei ahau ka tuku atu i au kia whakamanaia e koe."

Koia tenei te whakahoki mai a te Kawana:—

"E Te Pika,—Ka nui toku koa, mo te taha ki te Kingi, ki te whakaae a ki te whakamana i a koe, i ta te Whare o te Iwi i whiriwhiri ai.

"Ka nui toku pai mo tou pootitanga kia tu i teua turanga nui, i te mea hoki ko te tohu tena o te whakaaro nui o te Whare o te Iwi ki te tika me te mohio o au mahi."

Ka mutu te whakapai a te Kawana moku, mo te tangata i whiriwhiria e te Whare, ka penei atu ahau ki a ia:—

"Ka whakawhetai atu ahau ki a koe, e te Kawana, mo tau whakapai mai ki au, ki ta te Whare o te Iwi i whiriwhiri ai hei Pika mo ratou, na reira, tenei ahau, mo te taha ki te Whare o te Iwi o Niu Tireni, ka taumou ka kereme i o matou mana katoa, kia kore ai e wehi matou ki te whakapuaki i o matou whakaaro, a kia whai mana ai matou ki te haere atu kia kite i a koe ina tupono ki nga take tika katoa hei peratanga, a me pai to titiro ki a matou mahi katoa e whakahaere ai.

Koia tenei te whakahoki mai a te Kawana:—

"E te Pika,—Tenei ahau, mo te taha ki te Kingi, ka whakapumau i nga mana katoa o te Whare o te Iwi pera ano me tona mana o mua iho. Tenei hoki ahau ka whakaatu ki a koutou, ka tuwhera tonu te huarahi mai mo koutou kia kite i au, a ka pai tonu taku whiriwhiri i a koutou mahi katoa e whakahaere ai."

Te Pika (Mr. Speaker) .—Ko tenei, ka tuaruatia atu e au taku whakawhetai atu ki te Whare mo ta koutou whakaaro nui ki au, kua whakaturia nei e koutou hei Pika mo koutou.