Turei, te 17 0 Nowema, 1903.
RAHEI MO TAIAROA.

H. K. TAIAROA. —E te Tumuaki, he patai atu tenei naku, Kua tahuri ranei te Kawanatanga i tenei huihuinga o te Paremete ki te whakarite tikanga hei whakatau i te kotahi rau eka i Piopiotahi i whakaaetia e Komihana Matara ki a Taiaroa i te tau 1853 ? Ko taua whenua i whakaaetia e Komihana Matara ki taku matua i te tau 1853. Mate atu taku matua kaore ano kia whakataua atu taua whenua, tae mai hoki ki au nei, kua koroheketia au i au e tatari atu nei kia whakaritea mai. Kua tae hoki inaianei ki te rima tekau tau o taua whakaaetanga ki taku matua. I tera atu tau i tuku kereme atu au ki te Honore te Pirimia mo taua whenua me te ki atu ano kia utua mai te hua itareti mo te roa oku e tatari atu aua, a kei au ano te pukapuka utu mai a te Pirimia me tana ki mai ki te unuhia e au taku kereme mo nga hua itareti ka tukuna mai e ia he Pire kia hohoro ai te puta mai o taua whenua ki au. E tika ana i mauria mai ano he Pire e te Kawanatanga engari hoki i ngaro atu i roto i nga Komiti i whea ranei. Na kua roa ano hoki tenei, no reira kua kore au e whakaae kia whakakorea atu nga utu hua mo enei tau maha e tatari atu nei au.