I whakatuwheratia te Paremete e nga Komihana, e Hon. Henry John Miller, Hon. W. C. Walker, Hon. Colonel Pitt, me te Honore Mahuta Tawhiao Potatau te Wherowhero, Captain Baillie, a ko te Honore Mahuta anake o ratou i ngaro atu.

Te Komihana Tumuaki , Me whakaatu atu e an kia mohio mai ai te Kaunihera, e kore e tae mai te Kawana i tenei ra, no reira i whakaputaina ai e ia tenei Komihana kia taea ai te whakatuwhera te Paremete.

Whakahaua ana e te Komihana Tumuaki kia haere te Apiha-Whakataki ki te Whare o Raro, ki atu ai kei te hiahiatia kia haere mai ratou inaianei tonu kia rongo ki nga kupu o roto o te pukapuka whakatu i nga Komihana.

Ka tae mai nga mema o te Whare o Raro, ka tu atu ko.

Te Komihana Tumuaki. — I te mea e kore e tae mai te Kawana i tenei ra kua pai ia ki te whakaputa i tenei pukapuka whakamana, i raro i te hiiri o te Koroni, hei whakatu i a matou kua whakahuatia nei o matou ingoa i roto, kia tu matou hei Komihana, kia tu matou i tona tuunga, kia whakahaerea e matou i runga i te mana o tona ingoa nga mahi katoa e tika ana kia whakaritea i te whakatuwheratanga o te Paremete. Tenei ka panuitia atu nga kupu o roto o te pukapuka whaktu i a matou hei Komihana.

Panuitia ana e te Karaka taua pukapuka.

Te Komihana Tumuaki , E nga mema honore o te Kaunihera, me nga Rangatira o te Whare o Raro, kua whakahaua mai e te Kawana kia whakaaturia atu kia koutou, hei te Turei te 30 o nga ra o Hune nei, i te hawhe paahi te rua o nga haora o te awatea, ka tae mai te Kawana ki te whakaatu atu i nga take i karangatia ai te Paremete kia huihui mai. Engari hoki e whaitikanga ana kia matua kowhiria he Tumuaki mo te Runanga Nui o te Iwi, no reira ka tono atu te Kawana ki a koutou ki nga Rangatira o te Runanga Nui kia hoki atu koutou ki to koutou Whare Runanga ki reira koutou kowhiri ai i tetahi tangata totika mo taua tuunga tino rangatiratanga, a ka mutu tena ka arahi ake i a ia ki te whare o te Kawana i te Turei te 30 o Hune, i te tahi tekau ma tahi o nga haora o te ata, kia whakamanaia e te Kawana tona tuunga.

Hoki atu ana nga mema o te Runanga Nui ki to ratou Whare Runanga.