Hone Heke (Mema mo nga Maori o te Tai Tokerau). —Ka patai ahau ki te Minita Maori, Mehemea tera e whakaae te Kawanatanga ki te tango mai a ki te whakatu i tetahi Kohatu M runga ki te urupa o Hohaia Patuone, Rangatira Maori o Hokianga, Ngapuhi, i runga ano i nga huarahi kua takoto i nga Kawanatanga i runga i nga keehi penei? Ko tera Rangatira he tamaiti na Patuone tuakana o Tamati Waaka Nene. He tangata enei e mohiotia nuitia ana i runga i nga Motu e rua nei. Ka matauria nuitia raua i runga i to raua tu nui ki te awhina i nga iwi Pakeha i nga ra o mua, me to raua kaha ki te tiaki i te rangimarie. E mohio ana ahau he maha ano nga tohu whakanui a nga Kawanatanga mo raua me a raua mahi atawhai ki nga iwi Pakeha, i te whakaturanga o nga Kohatu mo raua, kotahi ki Kororareka, kotahi ki Takapnna. I te mea ko Hohaia te Kaumatua whakamutunga o tenei whanau, na reira i mahara ai ahau, he mea tika kia tonoa e ahau ki te Kawanatanga tetahi whakaaro kia tohungia i runga i te tango mai a i te whakatuunga o tetahi Kohatu mona.

Timi Kara (Minita mo nga Mea Maori). —Kua ata whakaarohia paitia taua take e te Kawanatanga, a ka taea e te Kawanatanga te hoatu tetahi awhina hei mea e tu ai tetahi tohu whakamaharatanga ki a Patuone. E rite ana kia kiia ake e ahau, he tohu nui, tika ma te koroni te awhina i tetahi tohu whakamaharatanga ki nga Rangatira pai penei me enei, mo a ratou manaaki nunui awhina pono i nga ra kua taha nei, i te wa e noho kiki ana e noho taumaha ana nga ahuatanga o te koroni nei, ki te pehi i nga tini raruraru me te awhina i nga ritenga katoa hei pai mo te koroni, he wa taumaha atu hoki era i te ahua e nohoia nei i naianei. Ko nga awhina penei i homai nei e Waaka Nene me Patuone ki te Karauna i nga ra timatanga o tenei Koroni, e tino tika ana kia tuhia ki roto ki nga whakapapa korero o tenei koroni, a nui ana te koa i roto i au ki te utu atu ki te honore mema i te kupu, ko te awhina e taea e te Kawanatanga te hoatu hei awhina i tetahi tohu penei, ka meatia e te Kawanatanga.