Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1901

Turei, te 5 o Noema, 1901

Turei, te 5 o Noema, 1901.

No te hawhe-paahi i te rua karaka ka noho te Tepute-Pika ki runga ki tona nohoanga.

Ka karakia te Whare.

Ka mutu etahi mahi a te Whare, ka karangatia kia whakahaerea ko te—

Pire Whakahaere I Nga Whenua Maori.

Timi Kara (Mr. Carroll, Minita mo nga Mea Maori).—Ka motini ahau, Me whakaae e tenei Whare nga menemana whakatikatika i paahitia e te Runanga Kaunihera mo tenei Pire. Ko nga menemana nei ko a tatou ano i whakaae ai i ta tatou komititanga i te Pire. Heoi ta te Kaunihera he whakawhitiwhiti i te noho o aua menemana i roto i te Pire, kia tika ai te noho.

Hone Heke (mema Maori mo te Tai Tokerau).—He hiahia toku ki te whakamarama i tetahi take i tu ake ai au. I kokirihia e te mema mo Nepia (Mr. A. L. D. Fraser) i mua tata ake nei, tetahi pitihana, mo te ki mai kei roto i taua pitihana e noho ana nga kupu whakahe a nga Maori kotahi mano e toru rau e whakahe ana ki te Ture Whakahaere i nga Whenua Maori o tera tau. Kaati, kua tirohia e au taua pitihana, a kua kite iho au he whanui noa atu ona tikanga, ara, e whakahe ana ki te Ture mo nga Mahi Nunui, te Ture Reiti, te Ture Hoko Whenua, me era atu Ture maha Kaati, he whakaaro naku kia ata whakamaramatia atu e au te tikanga o tena pitihana i tu ake ai ahau ki te mea atu ehara i te mea e whakahe ana aua kai pitihana ki te Pire nei engari e whakahe ana ki te nuinga o nga Ture katoa o te koroni.

Heoi whakaaetia ana nga menemana i whakaurua i te Runanga Kaunihera i runga i te motini o te Minita mo nga Mea Maori.

No tenei ra ka tino mutu nga korero mo tenei Pire, ara, no tenei ra tino paahi ai i nga Whare e rua o te Paremete.

No te rua tekau meneti ki te tahi karaka i te ata tu o te Wenerei ka hiki te Whare.