Whakatuunga Mema Mo Te Whare Kaunihera.

Hone Heke (mema Maori mo te Tai Tokerau).—Ka patai ahau ki te Kawanatanga, Mehemea, a te wa e whiriwhiria ai e ratou he mema hou mo te Whare Kaunihera, ka ata whakaarohia ranei e ratou te tika o Tamati Waaka Nene, kua mate, kia whai maharatia e te koroni, ka whakatu ai i tetahi o nga mokopuna a taua rangatira hei mema mo taua Whare Kaunihera? I roto i nga tau tata kua hori ake nei heoi ano nga Maori e whakatuungia ana hei mema mo te Whare Kaunihera mo te motu o Aotearoa no nga iwi anake o te Tai Rawhiti me te Tai Hauauru. Ko Meiha Ropata to te Tai Rawhiti, a i muri i a ia ko Mokena Kohere i mate nei, no te Tai Rawhiti ano; no reira ki taku mohio kua tae tenei ki te wa tika, mehemea e mahara ana te Kawanatanga kia whakatuungia ano he mema mo te Whare Kaunihera, kia whakaarohia e ratou te taha ki te takiwa Maori o te Tai Tokerau, a me tino whai mahara ratou ki nga uri o Tamati Waaka Nene, ara, ki taku whakaaro, me kowhiri he mema pera i roto i nga uri e ora nei o taua rangatira. He tino tangata totika etahi o taua whanau, a he mahi tika rawa kia whakaturia e te Kawanatanga tetahi o aua tangata hei mema mo te Whare Kaunihera.

Te Hetana (Mr. Seddon, Pirimia).—

E pouri ana ahau mo te korero a te mema honore e ki nei e whai kereeme ana nga whanaunga o taua rangatira i mate nei, i tika ai kia ata whakaarohia ratou, notemea mo te taha ki to tatou Whare Kaunihera, e kore rawa e taea te whakaaro atu ki nga mana tuku iho i runga i te momo, ahakoa he Pakeha he Maori ranei. A mo te taha ki tenei whanau e korerotia nei he ahua matara noa atu te whanaungatanga —ehara hoki i te mokopuna ake nana, engari he mokopuna-iramutu. Tenei ke te mea e whakaaetia ana e te Kawanatanga; e tika ana kia whakaturia etahi atu mangai ano mo te iwi Maori mo roto i te Whare Kaunihera, a kia tae ki te whiriwhiringa o taua take ka mahara ano matou kia whanui noa atu te kowhiriwhiri kia ahei ai he mangai mo ia wahi o te koroni, a hei nga tangata totika o te iwi Maori nga tangata e karangatia, kia totika ai he mema mo ratou ki roto i te Kaunihera.

Hone Heke.—E hara i te mea hei whakangawari i te whakaaro o te Kawanatanga i hapai ai ahau i taua whanau. Heoi he mahara e whai take ana taua whanau ki taua nohoanga.