Paraire, te 1 o Nowema, 1901.
Pitihana a Iritana Waimatao Me Tetahi Atu.

Te ripoata a te Komiti mo nga mea Maori o te Kaunihera mo runga mo te pitihana a Iritana Waimatao me tetahi atu (Nama 119).

"Mo runga mo te pitihana a Iritana Waimatao, inoi mai kia whakaritea te kupu whakaae, e kiia mai ana i whakaaetia ki tona tupuna ki a Rawiri Piharau, kia tukuna atu ki a ia tetahi rahui, e penei ana te whakatau a te Komiti, ara:—

"I tae ake a Te Whatahoro (J. A. Jury) ki te aroaro o te Komiti, ki mai ana ia i mohio ano ia ki taua whakaaetanga ki a Rawiri Piharau, me tona mohio kaore ano taua whakaaetanga kia whakaritea.

"I tae ake hoki a F. Waldegrave, te Hekeretari o te Tari Maori ki te aroaro o te Komiti, ki mai ia kaore he kupu o roto o te tiit[gap — reason: illegibl]i hoko o te Poraka o Tauherenikau mo taua rahui, engari i tae ano a Hiraki, tetahi apiha o taua Tari i muri mai nei, ki te whiriwhiri i te kereme a Rawiri.

"I te tau 1891 ka tu a Te Make, Kaiwhakawa o te Kooti Whenua Maori, hei Roiara Komihana, a whiriwhiria ana e ia nga tikanga o te Tauherenikau Poraka, a penei ana tana ripoata, ara:—

"'Kotahi tonu te rahui i roto i taua poraka, i Motupiri, ko tana 100 eka. Ko taua rahui i whakaritea mo tetahi Maori, ko Rawiri Piharau tona ingoa, engari hoki i hokona pohehetia atu ki a Mr. Vennell. I whakaritea atu ano tetahi atu 100 eka mo Rawiri, ko taua wahi e tata ana ki te Tekiona Nama 5, Tauherenikau, kaore tera i whakaaetia e Rawiri, no muri mai ka hokona te 150 eka mona i Te Pouawatea, a kaore hoki tera i whakaaetia e ia, notemea hoki he wahi wai, kaore i pai hei kainga. A kaore ano nei taua kereme kia whakaeangia.'

"Na i runga i enei take kua tuhia ake nei, e mahara ana ta koutou Komiti, i whakaritea ano tetahi rahui 100 eka i te wa i hokona ai taua poraka, penei ano me tenei e whakahuatia mai nei i roto i te pitihana, a kaore ano taua whakaaetanga kia whakaritea atu i te wa i tukuna mai ai te whakatau a Te Make, Kaiwhakawa, mo runga mo taua keehi.

"No reira ka whakaaro ta koutou Komiti he mea tika kia ata whiriwhiria e te Kawanatanga taua take, kia taea ai te kimi he huarahi hei whakarite pai, hei whakaoti tuturu i taua kereme, mehemea ra ia kaore ano kia whakaritea.