No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Ka whakahaerea etahi Pire, ka mutu era ka tae ki nga patai.

Te Rori Mo Te Muka.

Tame Parata (Mema Maori mo Te Waipounamu).—Ka patai ahau ki te Minita o nga Whenua, Mehemea ka whakonohoia e ia he moni ki runga ki te Rarangi Moni o tenei tau kia £75, i te mea ko nga moni era i whakahuatia e te Tumuaki Kai-ruri o Timaru, i roto i tana ripoata, e oti ai te rori e mahia mai nei i waenganui o te kainga Maori i Te Muka? I patai ano au i tera tau ki tera Minita o nga Whenua, a whakautua mai ana e ia, tera e whakanohoia kia £50 ki runga ki te Rarangi Moni hei whakaoti i taua mahi No muri i tera ka korerotia mai ki a au, i te mea kaore i whakapaua te moni tuatahi i wehea mo taua take, no reira kaore e taea te whakanoho ano he moni hou ki runga ki te Rarangi Moni hei whakaoti i taua mahi. Koia nei ahau i mahara ai kia patairia e au tenei patai ki te Minita hou o nga Whenua.

Te Takana (Mr. Duncan, Minita o nga Whenua).—Kaore he mea i roto i te tari i naianei hei whakaatu mai, ae, e tika ana kia hoatu ano he moni kia £75 hei whakaoti i te rori e tapahi ana i waenganui o te kainga Maori i Te Muka. Otiia kei te uiuia taua take a ki te kitea e tika ana kia hoatu ano he moni ka ata whakaarohia he huarahi e taea ai te whakarite a te wa e hangaia ai nga rarangi moni mo tenei tau.

Nga Wira Maori.

Tame Parata (mema Maori mo Te Waipounamu).—Ka patai ahau ki te page 15Minita Maori, Mehemea kua whiriwhiria ranei e te Kawanatanga te ripoata a te Komiti mo nga Mea Maori o tera tau mo runga mo nga Pitihana No. 69,100, 119, 197, me 220, a nga Maori o Te Waipounamu, mo runga mo te whai mana, mo te kore whai mana ranei o nga Maori ki te hanga wira hei tuku i nga whenua Maori? Kua rongo ahau tera etahi keehi e paangia ana e aua ripoata kua oti te whakatakoto atu ki te aroaro o te Kooti Piira mo nga whenua Maori, a kua whakahuatia atu e taua Kooti Piira tetahi keehi hei whiriwhiringa ma te Hupirimi Kooti mo runga i aua keehi; koia ahau i patai ai i tenei patai i runga i te tono mai a nga tangata e paangia ana e aua mea.

Timi Kara (Mr. Carroll, Minita mo nga Mea Maori).—I muri mai o te haringa ake ki konei o te ripoata a te Komiti kua whakawakia tetahi keehi e te Tumuaki Kai-whakawa o te Hupirimi Kooti ki Nepia, a whakataua ana e taua Kooti ko nga whenua e takoto ana he here i runga ka taea te tuku i runga i te wira. Ko tera whakatau tera. Engari e kore e taea e au te ki ka eke ranei kaore ranei e eke tera whakatau ki runga ki nga whenua here katoa ahakoa pehea te ahua o aua whenua; ma te iwi roia tera e whiriwhiri; otira he take tika ano tenei hei whiriwhiringa ma te Kawanatanga ina whakatakotoria mai ta ratou Pire mo nga Whenua Maori. Ko te whakaaro o te nuinga o te tangata e penei ana ko nga whenua kua tino hereherea nga taitara e kore e riro i te wira; engari ko etahi tu ahua here pera me tera i whakawakia e te Tumuaki Kai-whakawa i mua ake nei—ara, i puare ano pea tetahi taha o taua here e taea ai te riihi me era atu aronga tikanga—ka riro era Tu whenua i te wira ki taku mahara. Engari, i runga ano i taku kupu i te tuatahi ake ra, kaore e taea e au te ki ka tu tonu ranei taua whakatau hei tauira mo runga mo nga whenua here katoa kaore ranei. Engari maku ra e ata whakaaro ana tae ki te wa e whakatakotoria ai ta matou Pire Maori.

Ka mutu nga patai ka mahia ko etahi Pire a hiki noa te Whare.

No te rima meneti ki te tekau ma rua o nga haora i te po ka hiki te Whare.