Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paremete: 1900

Taite, te 5 o Hurae, 1900

Taite, te 5 o Hurae, 1900.

No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Hone Heke.

Te Maahi (Mr. Massey, mema mo Franklin).—Ka motini ahau, Kia whakaaetia kia kotahi wiki a Hone Heke e ngaro atu ana i te Whare, i te mea kei te whakahaere ia i etahi mahi e pa ana ki te iwi katoa.

Te Auhana (Mr. Houston, mema mo Peiwhairangi).—Ki taku mahara he mea tika kia whakaaturia mai e te mema honore ki te Whare he aha te mahi a te iwi katoa e mahia mai nei e Hone Heke. Ki te kore te mema honore nana te motini e ahei ki te whakaatu mai i taua mea, kaati ma te Pirimia pea e korero mai ki te Whare nei. He mea tika ki taku mahara kia whakamaramatia mai tenei mea ki te Whare.

Pirani (Mr. Pirani, mema mo Pamutana).— He whakatika taku ki nga korero a te mema honore mo Peiwhairangi.

Timi Kara (Mr. Carroll, Minita mo nga Mea Maori).—Kei te mohio au kei te raruraru a Hone Heke i roto i enei ra ki etahi huihui nunui, e rua e toru ranei, a ona iwi Maori mo etahi mea e pa ana ki a ratou. Kaore e roa ka tae mai taua mema honore ki konei, i te mea kua tae mai tana waea ki au whakaatu mai kua tata ia te haere mai.

Te Maahi (Mr. Massey).—He whakaatu taku, kua tae mai ano hoki he waea ma Hone Heke ki au, he mea mai kia tonoa atu e au ki te Whare nei kia hoatu kia kotahi te wiki hei ngaronga atu mona, i te mea e rua e toru ranei nga huihui nunui a ona iwi i te Tai Tokerau e tu ana i naianei, a e mea ana aua iwi kia tae atu ia ki reira. Kei te timatanga o te wiki e haere ake nei ka tae mai a Hone Heke ki konei.

Te Kanakorohi (Mr. Carncross, mema mo Taieri).—He patai naku, mehemea ka penei hoki he tikanga mo tatou katoa e noho nei? Tena ia na, mehemea, ka tono mai oku iwi, nana ahau i pooti, kia haere atu ahau ki tetahi huihui nui a ratou, ka whakaaetia ranei ahau kia haere?

Te Hetana (Right Hon. Mr. Seddon, Pirimia).—Ka tangohia ra hoki tetahi taha o nga moni (honorarium) a te mema. E hara i te mea ma te whakaae a te Whare kia ngaro atu tetahi mema i ana mahi i te Whare nei e kore ai e tangohia tetahi taha o ana moni (honorarium).

Heoi whakaaetia ana te motini.

Henare Kaihau.

Te Hetana (Right Hon. Mr. Seddon, Pirimia).—Ka tono atu ahau ki te Whare kia whakaroaina atu mo te wiki kotahi e ngaro ana a Henare Kaihau i te Whare nei. Kua tae mai te kupu a Mahuta ki au, ara, a te rangatira o nga iwi o Waikato, whakaatu mai kei te huihui nga Maori o reira i naianei ki te korero mo etahi take tera e takoto ki te aroaro o te Paremete, a me tana tono mai kia motinitia e au etahi ra mo Kaihau, i te mea ko nga mahi e whakahaerea nei e Kaihau e pa ana ki te iwi katoa

Heoi tukua ana te motini, ara, "Me hoatu kia kotahi wiki kia Henare Kaihau, hei ngaronga atu mona i te Whare, i te mea e raruraru ana ia i etahi mahi tino whai tikanga e pa ana ki te iwi katoa."

Kapene Rahera (Captain Russell, mema mo Haaki Pei).—Ki taku, mehemea nei kua penei te ahua o te Paremete, ara, kua riro ma nga huihuinga rawaho e whakahaere ana mahi, kua kore ma nga Minita. Ina hoki i runga i tenei ahua, kua kiia he mahi na te iwi katoa te huihuinga o etahi tangata ki tetahi wahi. Ki taku, kia ata takoto nga take i huihui ai tetahi hunga, katahi ra ano ka mohiotia e pa ana ranei aua take ki te iwi katoa kaore ranei.

Whakaaetia ana te motini.

Haere tonu nga mahi a te Whare i etahi Pire.

No te rima meneti ki te rima karaka i te po ka hiki te Whare.