No te hawhe-paahi i te rua karaka ka noho te Tumuaki ki runga ki tona nohoanga.

Ka karakia te Whare.

Ka panuitia tuatahitia tetahi Pire. Ka mutu tera, ka whakatakotoria te pukapuka whakamana a te Kawana i te whakatuunga a te Whare i to ratou Tumuaki. [gap — reason: damage]

Kupu Aumihi Mo Etahi Mema Kua Mate, Ara, Mo Te Toihi, Te Whiira Me Karauta.

Te Hetana (Right Hon. Mr. Seddon, Pirimia).—E te Pika, ka tu atu ahau ki te motini i etahi kupu aumihi ma tatou ki o tatou hoa mema kua mate, kua wehe atu nei i a tatou i roto i te tau kua pahemo ake nei, ara, mo Hoani Toihi (John Joyce), mema mo Lyttelton, mo Wiremu Karauta (William Crowther), tetahi o nga mema o te taone o Akarana, me Henare Whiira (Henry Field), mema mo Otaki. E te Pika, ka motini ahau: "Me whakahau e tatou kia tuhituhia etahi kupu ki roto ki nga pukapuka o te Whare hei whakaatu hei whakapumau hoki i to tatou whakaaro nui ki nga mahi i mahia mo te koroni e Hoani Toihi, e Henare Akuhata Whiira, me Wiremu Karauta, a me tuku atu e tatou tetahi kupu ki nga whanau a enei mema kua mate nei, hei whakaatu i te nui o to tatou aroha ki a ratou i runga i te nui o te mate kua pa ki a ratou." Katahi ka whakatepea haeretia e te Pirimia nga mahi a aua mema i mahi ai mo te koroni a mutu noa.

Kapene Rahera (Captain Russell, mema mo Haaki Pei).—Ka tu ahau ki te tautoko i te motini kua whakatakotoria atu nei e te Raiti Honore te Pirimia, ara, i tana e mea nei me tuku atu e tatou a tatou kupu mihi ki nga pouaru me nga whanau a enei mema tokotoru kua mate nei. Ka maha nga tau e noho ana aua tangata hei mema mo tenei Whare, a e mohio ana tatou ki te pai me te ngakau aroha o aua tangata. He tika tonu nga kupu a te Pirimia i korero ake nei mo te pai o nga whakaaro me nga whakahaere a enei mema. Tenei ano te roanga atu o ana korero.

Heoi whakaaetia ana te motini.

Te Hetana (Right Hon. Mr. Seddon, Pirimia).—Ka tu ake ahau ki te motini, Me nuku tenei Whare mo te hawhepaahi i te whitu karaka i te ahiahi o te Turei, hei tohu whakamaharatanga mo te nui o to tatou whakaaro ki a Hoani Toihi, Henare Akuhata Whiira, me Wiremu Karauta.

Whakaaetia ana te motini.

No te tekau meneti ki te wha karaka i te ahiahi ka hiki te Whare.

No te hawhe-paahi i te whitu karaka i te ahiahi o te Turei, te 26 o Hurae, ka huihui ano te Whare, a whakahaerea ana te Whai-korero mo te Kawana, a no te 27 o nga ra ka oti taua take.