No te hawhe-paahi i te rua karaka ka noho te Tumuaki ki runga ki tona no hoanga.

Ka karakia te Whare.

Ka panuitia tuatahitia, tuaruatia, a tuatorutia etahi Pire. Ka mutu era me tetahi motini me tetahi ripoata, katahi ka whakahaerea ko te ripoata mo te pitihana a—

Te Miini Kerekere Me Etahi Atu Tangata.

Te Auhana (Mr. Houston, mema mo Peiwhairangi).—Ka whakatakotoria e ahau te ripoata a te Komiti mo nga Mea Maori mo runga i te pitihana a Te Miini Kerekere me ona hoa tokowhitu, a ka motini ahau kia takoto taua ripoata ki runga ki te teepu.

Wi Pere (mema Maori mo te Tai Rawhiti).—Ka motini ahau kia whakahokia atu te ripoata ki te Komiti mo nga Mea Maori kia whiriwhiria ano. Te take i kore ai te ripoata a te Komiti e tautoko i te pitihana, koia tenei: he kore no nga kai-pitihana i tuku tono ma ratou ki te Kooti Piira kia whakawakia tuaruatia. Kaati, e penei ana taku kupu kaore aua kai-pitihana i mohio ki nga tikanga o te ture, mehemea hoki i mohio kua tukuna atu he tono piira ma ratou. Kaore ratou i tino mohio ki nga aronga katoa o te ture, a i te mea ko tenei Whare te Kooti Piira whakamutunga e tuwhera ana ki a ratou, mehemea ka whakahengia ta ratou pitihana kua waiho tena hei tauira mo nga pitihana katoa i penei te ahua. Ka riro noa atu o ratou whenua i te tangata ke, a ka ki tonu atu ahau he nui nga whenua Maori i tangohia hetia i nga tangata tika page 19i runga i enei tu huarahi. Kaore ahau e pai kia waiho e te Komiti te ripoata mo te pitihana nei hei tauira mo nga pitihana i penei te ahua, na kona ahau i motini ai kia whakahokia ano tenei pitihana ki taua Komiti. Ki taku titiro kaore rawa e tika kia whakamatea enei tangata i runga i to ratou kuare ki nga aronga o te ture.

Te Auhana (Mr. Houston).—He maha noa atu nga pitihana penei te ahua e tae mai ana ki te aroaro o te Komiti mo nga Mea Maori. Kaati kua roa te wa e whakaaro ana te Komiti kaore e tika kia kawea mai enei tu ahua pitihana ki tona aroaro. Kua oti hoki e te ture te hanga he Kooti Piira hei whakaarahanga ma nga Maori i a ratou kupu whakahe ki nga whakataunga a te Kooti Whenua Maori, me nga huarahi e taea ai te pera kua oti katoa te whakatakoto. He maha nga kai-pitihana i rite tonu te ahua o a ratou tono ki te inoi a te pitihana e korerotia nei, ara, kaore i tuku piira ma ratou ki te Piira Kooti, a te tukunga iho he tuku pitihana mai ki te Komiti mo nga Mea Maori. Na reira kua penei te whakaaro o te Komiti, kaore rawa e tika kia tamia noatanga iho e te Komiti ta te Kooti mo runga i nga mea penei. Kei etahi o nga pitihana penei te ahua kiia mai ai he kuare ki te ture te take. Kaati kei te mohio katoa tatou he nui rawa atu nga Maori e haere tonu ana ki nga Kooti Whenua me to ratou tino mohio ano hoki kei te puare ki a ratou te huarahi mehemea e hiahia ana ratou ki te tuku piira ma ratou; a ki te kore ratou e tahuri ki te whakahaere i a ratou i runga i tera tikanga, kaati, ki taku mahara kaore rawa ratou e tika kia haere mai ki tenei Whare tono mai ai kia tahuri tenei Whare ki te whakararuraru i te Kooti Pira. Mehemea hoki ka pena kua whakatu tena i tetahi tikanga kino rawa atu, a ki taku mohio e kore rawa ano pea hoki tenei Whare e whakaae ki tena. Ka nui rawa nga pitihana penei e tae mai ana ki te Komiti, a ki taku mohio kaore rawa he painga e whakahokia atu ai tenei pitihana, notemea e kore ano hoki e rereke atu i tenei ripoata te whiriwhiri a te Komiti.

Hinga ana te motini, a whakaaetia ana te menemana kia whakahokia ano te ripoata ki te Komiti. Haere tonu nga mahi a te Whare, a no te weherua i te po ka hiki te Whare.