Ki a Whititera,—

Katahi au ka kite i nga korero a Tamihana te Rauparaha i roto i te Nupepa e ki nei i te tono moni au ki a te Petatone mo Rangitikei. He tito rawa tenei korero a Tamihana he piwhi whenua ano ko Eketahuna te ingoa kei Ruamahanga e tata ana ki Wairarapa ko te kai hoko i taua whenua ko Te Peti, ko tenei te whenua i korero ai au ki a te Petatone, kaore i tata mai tera whenua ki Rangitikei e 100 maero pea te roa o tera whenua ki Rangitikei koia tenei te henga o te korero a Tamihana; i tana hokonga pea i Mana, i meatia ranei e ia no Kapiti nga moni? i tana hokonga i te motu o Ngaitahu, i meatia ranei e ia no tenei motu nga moni? Ko Manawatu ki Rangitikei tekau marua maero, i tana hokonga i Manawatu, kaore a Rangitikei i riro, me whakamutu rawa te tito o Tamihana i naianei, e kore ranei e whiu ki te tito. Ko enei korero a Tamihana e hae ana ia ki nga tangata whai Pamu whai reti, o Rangitikei ko tana i whakaaro at me hoko kia rite ai ki a i a kaore nei ona eka i Rangitikei. Heoti ano.