Ki a Whititera,—
Tena koe. Kua kite au i ta matou Pukapuka o te 14 e Aperira, i kite au ki roto ki te Nupepa o Poneke o te 28 o Aperira. E ki ana taua Pukapuka, ko taku waha i nui ki te korero mo te pupuru Whenua ko taku ringaringa kua tuhituhi ki te Pukapuka tuku whenua, he tito rawa tenei korero, o te Nupepa o Poueke; kei runga tonu au o te pupuru whenua, kore rawa taku ringa i mau atu ki te pene kaore i tuhituhi kaore hoki au i kite i taua pukapuka.
Ko tetehi kupu hoki o taua Nupepa, e ki ana, kaore ano i mutu nga korero, tuhituhia kautia ta matou Pukapaka, o te 14 o Aperira, he tito rawa tenei kupu o te Nupepa ko te ahiahi tenei o te Hatarei te 14 o Aperira ko te ra tenei i utua ai a matou korero e te Petatona, whakamutua rawatia nga waha o te pupuru whenua kei hamumu heoti te korero i whakatuwheratia e te Petatona, i taua ahi-ahi ko ta ratou korero ko te tuku whenua kia nui ake te moni kia iti iho ranei kore rawa he korero i toe. E tika ana pea ko a ratou korerotanga ko ana hoa tuku whenua i te Ratapu ko wai hoki matou ko nga tangata whakapono ka rongo atu kaore hoki he ritenga i a matou o tera korero, o te whakari-terite moni kia nui ake ranei kia iti iho ranei, e uru kau atu ai matou ki tera korero. I te ata o te 16 ka pakaru katoa nga tangata. Heoti ano.
Na Henere te Herekau.