10.	Enei mahi Ture, ka oti nei te korero, maha noa atu nga tau, maha noa atu nga whakatupuranga, i mahia ai ki Ingarini, me te neke tonu ake ano taua Iwi nei. Kihai ratou i hohoro te ata noho i runga i te tika. He wa ano ka roa te ata-noho, na ka kori ano; ka puta ake he tautohetohe, he pakanga whenua, mo te Kingitanga kia riro i tetahi. Inaianei kua mutu katoa enei. Maha noa atu nga tau i kore ai te pakanga whenua o Ingarani: he tautohetohe kupu kau to enei wa, he mea na nga kai hapai tikanga. Ta ratou patu ko ta te arero; kahore a te ringa. Ta te Ture, mau tonu tana haere, a puta noa i te whenua; takoto tika ana te taonga, he mea ata whakarere iho e tetahi tangata ma tetahi tangata, te ai he patu, te ai he aha. Ka puta ake he tautohetohe, ka tukua ma etahi tangata mohio, tangata tika, e whakarite, ara, ma nga Kai-whakawa ratou ko nga Kai-whakawa nui.
11.	Neke ake ana te Ture, neke ake ana hoki te taonga. Kei te hokohoko ratou ki nga whenua katoa, a hua noa iho nga mea papai o ia wahi, o ia wahi o te ao ki Ingarani. Maha noa atu nga huri, nga aha noa, kua kitea hei haoga mo nga tini mea, hei whakaranea ano hoki mo ta te ringaringa. Era atu whenua o mua, he tini nei nga tangata, he nui nei te taonga—whenua he pai noa atu nei te ra, te oneone, te aha, te aha,—kua rawakore era, kua torutoru nga tangata i te kino o te Kawanatanga, i te ture kore o nga tangata. Ko Ingarani ia e neke tonu ake ana ki te nui; mohio rawa, kaha rawa nga tangata ki te ngaki kai; tini iho hoki, tini iho nga tangata.page 76
12.	Te Iwi tupu ano hoki o taua whenua, hei te noho nei ratou i runga i te rangi-marie, he mea he numi noa atu ki roto ki nga iwi tae hoa mai. To ratou reo nui, ko to Ingarani. Ko te reo hoki tera o te tokomaha. E mohiotia ana taua reo e nga tangata katoa o taua whenua nei, i hohoro ai ratou te mohio ki ta tetahi ki ta tetahi, i hohoro ai hoki a ratou mea tautohetohe te takoto pai. Kei te mau ano ia nga reo tupu o mua. E korerotia nei ano inaianei i etahi wahi o Britain, i etahi wahi ano hoki o tenei motu o Niu Tireni.

Te Mutunga.

Te whakaaro i tuhituhia ai tenei pukapuka he mea kia mohio ai nga tangata maori ki te Ture o Ingarani; ki nga Ture patu hara, ki nga Ture ano hoki e hua ai, e mau ai, te taonga, ki nga ture ano e mau ai te pai i roto i nga whanaunga, e neke ake ai hoki te Iwi, e kaha ai. Nui atu te koa o te ngakan ki te whakanuia enei ture ki tenei whenua, kia rite ano hoki ki to Ingarani. Kotahi tonu te Ture e taumarumaru ana i reira ki runga ki nga tangata iwi maha; kia pera ano ki tenei Motu. Ahakoa maha nga tangata iwi ke o konei, kia kotahi tonu te Ture mo ratou; katahi ka mau ta ratou noho i runga i te atanoho, i te taonga, a,—te otinga,—kotahi tonu te Iwi.

E Hara Tenei I Te Mea Noa Ki A Koutou; Ko To Koutou Oranga Hoki Ia.TiuteronomiXXXII. 47.

page break page break page break page break