I tuhera te Tiriti o Waitangi i tenei ra ko nga tangata i uru ki roto i taua Whare e 740.

Ko Heta te Haara te Tumuaki i te Mutunga o te karakia whakatuhera a nga Minita tokorua Matiu Kapa raua ko Hauraki Paora.

Ka tu a Heta te Haara ki runga ka mea—Kia whakapaingia a Ihowa te Atua o Aperahama te Atua o Ihaka te Atua o Iharaira koia nei te Atua o tatou tupuna nana nei ratou i Arahi ora mai i te moana nei i whiti mai ai ki enei motu e noho nei tatou me hoatu te kororia ki ai a, ake, ake, ake.

E hoa ma e nga Rangatira whaimana o nga iwi Maori o nga motu e rua o Aotearoa me te Wai-pounamu kua hui mai nei ki te Tiriti o Waitengi, Tena ra koutou.

Kia ora tonu ma te atua tatou e tiaki e manaki e whakakaha ki te whakahaere i nga tikanga pai e ora ai te Iwi Maori me nga motu i runga ano i te aroha me te whakapono.

Tenei ahau te tu nei i mua i o koutou aroaro e nga rangatira o nga iwi ki te hoatu kia koutou i te nui o te hari me te koa o nga ngakau o nga Rangatira me nga iwi o te pito whakararo mai o Akarana mo ratou kua kite a tinana atu ia koutou kua huihui taki nei koutou mema tou ki te Tiriti o Waitangi nei ki te ata whiriwhiri me te ata tirotiro i nga ritenga katoa o roto i nga take meake nei whaka-takotoria atu ki o koutou aroaro kia mahia.

Ka whakatakotoria e taku komiti ki o koutou aroaro nga take tuatahi i whakaaetia e o tatou matua tupuna hoki ara.

1.	Ko te Runanga whiriwhiri o te tau 1835.
2.	Ko te Tiriti o Waitangi i te tau 1840.
3.	Ko te Rarangi 71 o te ture nui mo Niu Tireni o te tau 1852.
4.	Ki a kauaka e tipu ake he Raruraru i waenganui o nga iwi e rua o Niu Tireni.

Ma koutou ano hoki e whakatakoto a koutou nei take i kite ai he pai he marama mo tenei whaka-kotahitanga ki te aroaro o to koutou whakaminenga Rangatira i roto i tenei huihui nga kia whiriwhiria.

Ka ata whakakitea ano hoki kia koutou nga Pukapuka rarangi ingoa i hainatia e nga Iwi Maori i runga i nga motu e rua o Aotearoa me te Waipounamu mo tenei whakakotahitanga o te Iwi Maori.

Ka whakina ano hoki ki tenei whakaminenga nga manakitanga mai a nga iwi ki nga kai whakahaere i te haina o nga Iwi Maori i roto i nga tau e rua kua pahure ake nei.

Ka panuitia ano hoki te Pukapuka Rarangi ingoa o nga Rangatira i whiriwhiria mo te Runanga o te kotahitanga o te Iwi Maori i tuhi a nei i te tau 1889 no roto i nga iwi e wha Ngapuhi Te Rarawa Te Aupouri me Ngati Whatua engari e puare ana mo te whakauru mai o etahi o nga Rangatira ki roto ki taua Runanga whiriwhiri te hunga kahore i uru i mua.

page 10

Ka korerotia ano hoki ki a koutou nga iwi kaore i tuhi i o ratou ingoa ki roto i nga pukapuka whakatuturu i te whakaaetanga ki te whakakotahitanga o te Iwi Maori.

Ka panuitia atu ano hoki te puka puka a te komiti i whiriwhiri a i te hui i tu 14 Omanaia Hokianga i te 15 o nga ra o Mei, 1890, me nga mahi katoa a te komiti i muri iho, Heoi ano.