Pire Poto. Mo te Kooti Whakawa Whenua Maori me ona apiha. Me Ona Ture.
E whakaaro ana ahau te Pirimia mo oku hoa minita e tika ana he nui te mate e pa ana ki te iwi Maori me ona hapu me ona rangatira, me o ratou whenua i runga i nga ture, me nga whakahaere a te Kooti Whakawa Whenua Maori e tu nei. No reira e tono atu ana ahau i runga i te mana i homai nei e koutou ki au me oku hoa minita.
Ki nga rangatira honore o te Runanga nui o te kotahitanga kia whakaarotia e koutou e noho hui hui nei i roto i tenei whare, ta koutou tino whakaaro mo te Kooti whakawa whenua Maori, me ona Ture.
Take Tuarua. E tono ana ahau me oku hoa minita i runga ano i taua mana kia whakaarotia e koutou kia tukua atu tetahi pitihana kite Paremata nui e tu mai nei i Poneke arai atu kia whaka-mutua te mahi Ture a te Paremata mo te iwi Maori me o ratou whenua, engari me inoi atu kia tukua mai te mana ki te iwi Maori ano, ma te iwi Maori ano e hanga he ture, hei whakahure i te iwi Maori me ona whenua me me ona Taonga.
H. Mangakahia, Pirimia., Raniera Te Wharerau, Mitai Titoro,, Timoti Te Whiu, Minita. Raniera Erihana.Raniera Turoa.H. P. Tunuiarangi..
Henare Hira.—
E hoa, ka mutu nga korero e tukua atu ana inaianei engari me apiti e koe tenei. I te 15 o nga ra o Hune, 1892. Ka whakatakotoria e Meiha Keepa Te Rangihiwinui, e Wi Parata Te Kakakura me nga rangatira o te Taihauauru tetahi Haki hou. Te ingoa o taua haki ko Maui. Kei roto i taua Haki te whakaahua o nga motu e rua o Aotearoa me te Waipounamu, me te whakaahua o maui e tu ana ona waewae i runga i nga motu e rua, e tu ana ana Haki e rua i runga i nga motu e rua. Koianei te ahua o taua Haki. Ko te tikanga o tenei Haki he whakaatu i te kotahi-tanga o te iwi Maori o nga motu e rua. I te whakatakotoranga o taua Haki ki te aroaro o Henare Tomoana, me nga rangatira o Heretaunga o Wairarapa i te mutunga o te korero a nga rangatira mo page 9taua Haki, whakamihi ki nga rangatira o te Taihauauru mo to ratou mahinga i taua Haki. Ka karangatia nga hapu i hui mai ki te Waipatu kia puta ki te marae noho ai. E toru e wha tini pea te mamao mai o te Peene i te marae ara te Peene Maori o Whanganui. Ka hui nga rangatira o Heretaunga o Wairarapa ki muri i taua "band" me nga Haki e rua, te Haki o te Tiriti o Waitangi, me te Haki e kiia nei ko Maui. Ka karangatia kia haere ka timata te tangi o te band tae noa ki waenganui o te marae ki te wahi e noho ana nga tangata, ka tahi ka whakatakotoria aua haki ki te aroaro o Ngapuhi me nga iwi katou i hui mai hi te marae. Ka tu a Rev. Hoani Piwaka ki te karakia, ka mutu, ka timata a Henare Tomoana ki te korero whakamarama i nga tikanga o taua Haki o Maui, me nga moni i whakatakotoria e Meiha Keepa. Ka mutu nga whakamarama a Henare Tomoana, ka tu a Ngapuhi ki te mihi. I te mutunga ka hiwia aua Haki e rua, ko te Haki o te Tiriti o Waitangi i runga, ko Maui i raro iho.