Ture Kohi Moni He Whakaatu.

Tenei kia mohio ai koutou e nga iwi e nga hapu katoa o te iwi Maori e noho ana i runga i Aotearoa me te Waipounamu he whakaatu tenei. Kia mohio ai koutou mo runga i te Ture kohikohi moni i whakaaetia nui e te Paremata Maori i tu nei ki te Waipatu wahi o Heretaunga a i paahitia tana Ture kohi moni i te ono o nga ra o Hurai, 1892, no te mea kua whakaaroa e tau Paremata he mea tika kia kohikohia he moni hei whakau. Mo tenei kotahitanga mo nga mate hoki i raro i te Tiriti o Waitangi mo etehi atu mahi hei tautoko i te Tiriti o Waitangi a kua whakahaua nei ia tangata ia wahine ia tamaiti ka tekau ma ono nei o ratou tau kia kohikohi. Ko te moni ma te tangata kotahi pauna i te tau a e kore e araia e tenei Ture nga whakaaro o nga Rangatira e mea nei kia nui ake o a ratou nei moni e kohi ai. Ma ia takiwa ma ia takiwa e whakaae nei ki tenei tikanga ma ratou e whakatu he komiti mo page 17ratou Hei ata whakahaere i nga tikanga mo te kohikohi moni mo to ratou nei tikawa ma taua komiti hoki e ata whakarite o ratou nei tangata e kitea ana he tangata tika kia tokorua hei haere ki nga takiwa katoa o to ratou nei rohe kohi haere ai i te moni ko aua tangata tokorua i whakantea ra me whai pukapuka mehemea ka homai te moni e te tangata nana ki nga kai kohi me tuhi e te tangata nana te moni tona ingoa ki te pito o te pukapuka e puritia ana e nga kai hoki moni me tuhi hoki e nga kai kohi moni o raua ingoa ki te pito o te pukapuka e hoatu e raua ki te tangata nana nei te moni me hua tana pukapuka he Ritiiti no aua moni me tuhi te marama te ra me te tau ki runga ki aua pukapuka a e rua ko aua pukapuka katoa i hoatu ra ki nga tangata na ratou aua moni kua riro ma ra i nga kai kohi me tiaki rawa kei ngaro tetehi ma aua kai kohi moni ra e whakamahara atu ki nga tangata katoa e hoatu ana e raua aua pukapuka Ritiiti. Ki te mutu te kohi aua tangata tokorua i tonoa ra e te komiti ki te tai mai. Raua ki te kainga kei reira nei te komiti me noho taua komiti a me whakatakoto e aua tangata kai kohi moni ra nga pukapuka katoa i hainatia ra e nga tangata na ratou nei aua moni i riro maira ia raua. Me whakatakoto hoki e aua kai kohi moni nga moni i kohia ra raua ki te aroaro o te komiti ma taua komiti e whakarite nga tino tangata e mohiotia e te iwi he tangata pono marama ma ratou e tiaki aua moni ki ta te komiti wahi i pai ai hei takotoranga mo aua moni. Kei te wa ra ano e tu ai te Paremata o te iwi Maori hei reira ka tika ai kia haria atu nga pukapuka o aua moni a ma te Paremata o te iwi Maori e mahi he Ture kia whakaputaina aua moni ki te Kawanatanga o te iwi Maori a ma te Kawanatanga me tona Paremata e mahi he Ture hei mahi i nga mate o te iwi Maori hei whakaputa ano hoki i te pai ki nga iwi Maori o tenei motu i raro ano i te mana o te Tiriti o Waitangi.