Copy of the Treaty of Waitangi, in the Native language. (Copied from Parliamentary Papers of 1844, page 325.)
Ko Wikitoria te Kuini o Ingarani i tana mahara atawai ki nga Rangatira me nga hapu o Niu Tireni, i tana hiahia hoki kia tohungia ki a ratou o ratou Rangatiratanga me ta ratou wenua, a kia mau tonu hoki te rangi marie ki a ratou me te ata noho hoki, kua wakaaro ia he mea tika kia tukua mai tetahi Rangatira hei kai wakarite ki nga tangata Maori o Niu Tireni kia wakaaetia e nga Rangatira Maori te Kawanatanga o te Kuini ki nga wahi katoa o te wenua nei me nga motu.
Na te mea hoki he tokomaha ke nga tangata o tona iwi kua noho ki tenei wenua a e haere mai nei.
Na ko te Kuini e hiahia ana kia wakaritea te Kawanatanga kia kaua ai nga kino e puta mai ki te tangata Maori hi te Pakeha e noho ture kore ana.
Na kua pai te Kuini kia tukua ahau a Wiremu Hopihona, he Kapitana i te Roiara Neiwi, hei Kawana mo nga wahi katoa o Niu Tireni, e tukua ai a ia nei amua atu ranei ki te Kuini; e mea atu ana ia ki nga Rangatira o te Wakaminenga o nga hapu o Niu Tireni, me era Rangatira atu, enei ture ka korero tia nei.
Ko te Tuatahi.
Ko nga Rangatira o te Wakaminenga, me nga Rangatira katoa hoki, kihai i uru ki taua Wakaminenga ka tuku rawa atu ki te Kuini o Ingarani ake tonu atu te Kawanatanga katoa o o ratou wenua.
Ko te Tuarua.
Ko te Kuini a Ingarani ka wakarite ka wakaae ki nga Rangatira, ki nga hapu, ki nga tangata katoa o Niu Tireni, te tino Rangatiratanga o o ratou wenua o ratou [gap — reason: damage]ainga me o ratou taonga katoa. Otiia ko nga Rangatira o te Wakaminenga me nga Rangatira katoa atu, ka tuku ki te Kuini te hokonga o era wahi wenua e pai ai te tangata mona te wenua ki te ritenga o te utu e wakaritea ai e ratou ko te kai hoko e mea atu nei e te Kuini hei kai hoko mona.
Ko te Tuatoru.
Hei wakaretanga mai hoki tenei mo te wakaaetanga ki te Kawanatanga o te Kuini. Ka tiakina a te Kuini o Ingarani nga tangata Maori katoa o Niu Tireni. Ka tukua ki a ratou nga tikanga katoa rite tahi ki ana mea ki nga tangata o Ingarani.
William Hobson,
Consul and Lieutenant-Governor.
Na ko matou, ko nga Rangatira o te Wakaminenga o nga hapu o Niu Tireni, ka huihui nei ki Waitangi. Ko matou hoki ko nga Rangatira o Niu Tireni, ka kite nei i te ritenga o enei kupu ka tangohia ka wakaaetia katoatia e matou. Koia ka tohunga ai o matou ingoa a matou tohu.
Ka meatia tenei ki Waitangi i te ono o nga ra o Pepuere, i te tau kotahi mano, ewaru rau e wa tekau, o to tatou Ariki.
(512 signatures.)