E pa amu teia no te vaine a Akanoa no te vaine a Anautoa i mate.

1 Aue te akatai au mate i te aki nga ki te are pure raa, te iinga atu iaku mata ki tona ngai, ngaro ua i te angai tu maira ki tai, ka maara nei au ki aia i aere ana, i taa ana i roto i te are pure raa, i arato ana i runga i te moe amuri i te pona me aere e.
2 Taku apinga rekareka e tomo ki te are pure raa te autu ra taku manako, ka tae mai nei ki tua mataiti manava kino [unclear: muata] kare e rave a i te iko mai i taku tumaiti kua riro roa ki tana e.
3 Oki roa mainei toku tu i toku au anga i i mu a ana te kore nga aku tamariki i anau, ka tae mai nei ki teia tuatau. Rave mai nei au i tu manako ra.o Iobu, i roto ra i tana puka, i aere taa ka ua mai au mei roto i te kopu o taku metua vaine, ka oki taaka ua atu rai ma te kore e tamariki i vaio anu i te ao e,
4 I tu ana i tena apinga e tamariki, te kore ua nei i tua tuatau, ko au takataka ua teia e noo nei mari nga mea utaro tamariki nei aau ei mataora noku, ei aka nana aroa anga naku ki reira iakoe e.
5 Kare e poka i te tuatua a te mana katoatoa e onepueu te tangata nei no te enua i anga ia ai, ka riro roa rai ki reira ra, me mate e, kare e tangata i ruarangi, mari ko Elia ma Enoka ko tei kore roa akera te one e piri maira kia raua e.
6 Kare e tu pakararau tena apinga e akarongo me kino te ngakau, ka aiti ia mei te vai keu i te puke anga, ka peke te teita ka peke taku kekeretu i tei reira taime e.
7 Aue maine taku mea akotai i mate akenei otira rai taku mataora ko ia taku tiare puera angaanga, taku marumaru aitu ko taku apinga i mate ra.
8 E tu me tae mai te tangi te maara kia koe, taku manako, ei te vaitata te rua oou e roa ai te oro nga oku ki vaikeri e mamao e.
9 E aere te aere e aki mai, e maara koe e ana ai e au e, tei roto koe ra i te are i te tui kakau no au ma tamariki otira kua mataora e.
10 Ko tae ki te aiai e mumu nga ia no te tangata na roto i te au ngutuare katoatoa, tatari au i taku i tona taenga mai e anaai e au e tei raro koe ra ia Tumu ma te tuaine o to tane me kore i rari tei uta i Tapaenua ia venu tei te angaanga tui kakau koe ma to Taokete e.
11 Turituri ei, maniamania te rai puka o teia ao te apari anga mai, me koai ia tangata i tari mai na i te au puka pikikaa a Satane mei te po, ei aka reka vaa nona ki te ngai tangata kia reka ia, me vaine me tane, kare mari koe i kite i te ture auraka koe e tapepe pikikaa ua ia tetai ke, ka ora tika koe i taau ara ka paka atu ki tai ai a Taeke e, ka ora tika koe i tetai o ora ka mate atu ki tae ai a Satane e.
12 Akotai rai ora i rauka vave i te ua ra, akotai no te tangata keikua kare i manata i te kimi i raro nei, me kua rauka ia koe tei reira tu manako, katai taonga e maine, kare e moana e aeai, te meitaki vaerua ka tomo ei pani i runga i te upoko te ara e.
13 E aere tiratira tu to aere nga, auraka e akama e tiketi tetai ei taonga koia toou manako i te tavaitai marie anga, te tukunga atu ki te Ona o te apinga, ka noo koe ke [unclear: tapapa] i taau i te omai anga, koia te ora, te pare korona te kakau teatea te rara parama te noo anga mou e mataora roa, ka noo mou atu ei, ka noo te noo, e mataiti e mataiti atu kare e apinga e.

[Note added by Bob O'Brien as transcriber:] 12 Tera rai tetai amu no te tama Aua

Kake ki uta eke ki tai motumotu ua nga turi i te ara mauku io aua topa ia ai o Mokiti ko Nikao te aite e.

- Mei te tuki i to paepae mei te ngutupa i to are, tutaki ki te are o ngati Tangiia nui turu ua te maomao e.

[Note added by Bob O'Brien as transcriber:] 13 Tera rai tetai amu na tetai vaine i tou.

Te pa to kura i vao ake, te puranga i te moe, nga no maua e, ko te piripiri tatara moa e. E tu enua tei te maunga e rata mura tei, roto iaku ra e tuputupu ra tei karanga, e kaore au e noo ki te pae o taku tane ei te maunga taku kapapa i te rimu kura ia te koe e, kia tupu te mataora ia i runga iaku e taku tane i kia vaetata ua mai te puange o taua kia aunga miri taku tomo nga ki roto e.